யாழ்ப்பாணத்தில் வாந்தி எடுத்தபவிஹா உயிரிழப்பு!!

யாழ்ப்பாணத்தில் வாந்தி எடுத்த சிறுமி ஒருவர் இன்று பரிதாபமாக உயிரிழந்துள்ளார். யாழ்ப்பாணத்தைச் சேர்ந்த எட்டு வயதுடைய முகமது ஜிஹாட் பவிஹா என்ற சிறுமியே இவ்வாறு உயிரிழந்தவராவார். 

குறித்த சிறுமிக்கு கடந்த 13ஆம் திகதி வயிற்றுவலியுடன் வாந்தி ஏற்பட்டுள்ளது. இதனையெடுத்து தனியார் வைத்தியசாலை ஒன்றில் அவருக்கு சிகிச்சையளிக்கப்பட்டது. அதன் பின்னர், இன்று அதிகாலை ஒரு மணியளவில் மீண்டும் வயிற்றுவலி ஏற்பட்டதுடன் அவர் வாந்தி எடுத்துள்ளார். 

நிலைமை மோசமடையவே, அதிகாலை 4:30 மணியளவில் சிறுமி யாழ்ப்பாணம் போதனா வைத்தியசாலையில் அனுமதிக்கப்பட்டார். இருப்பினும், அங்கு சிகிச்சை பலனின்றி இன்று மதியம் அவர் பரிதாபமாக உயிரிழந்துள்ளார். சிறுமியின் சடலம் மீதான மரண விசாரணைகளை திடீர் மரண விசாரணை அதிகாரி நமசிவாயம் பிறேம்குமார் மேற்கொண்டார். 

 சிறுமிக்கு குடல்வளரி (Appendicitis) பாதிப்பு ஏற்பட்டதால் வயிற்றுவலி ஏற்பட்டுள்ளது. அதன் காரணமாக அவர் வாந்தி எடுத்த வேளையில், வாந்திப் பொருட்கள் எதிர்பாராத விதமாக சுவாசக் குழாயினுள் சென்றதாலேயே மரணம் சம்பவித்துள்ளதாக உடற்கூற்று பரிசோதனையில் தெரியவந்துள்ளது

கணினி மோசடி 9 சீனர்கள் கட்டுநாயக்கவில் கைது!!

கணினி வழி நிதி மோசடிகளைச் முன்னெடுப்பதற்காக இலங்கைக்கு வருகை தந்த 9 சீனர்கள் இன்று (16) அதிகாலை கட்டுநாயக்க விமான நிலையத்தில் வைத்து கைது செய்யப்பட்டுள்ளனர். இவர்களிடமிருந்து 2 கோடியே 40 இலட்சத்து 20 ஆயிரம் ரூபா பெறுமதியான மின்னணுத் தொடர்பு சாதனங்களை விமான நிலைய சுங்க அதிகாரிகள் கைப்பற்றியுள்ளனர். 

இந்த சீனப் பிரஜைகள் இன்று அதிகாலை 12:25 மணியளவில் சீனாவின் குன்மிங் நகரிலிருந்து 'சைனா ஈஸ்டர்ன்' ஏர்லைன்ஸ் நிறுவனத்திற்குச் சொந்தமான MU-6912 ரக விமானம் மூலம் கட்டுநாயக்க விமான நிலையத்தை வந்தடைந்தனர்.

 அவர்கள் தங்களது உடல் மற்றும் ஆடைகளுக்குள் செல்லோடேப் மூலம் ஒட்டி மறைத்து வைத்திருந்த 383 பயன்படுத்தப்பட்ட கையடக்கத் தொலைபேசிகள், 101 டெப் கணினிகள் மற்றும் 06 வைஃபை ரவுட்டர்களை அதிகாரிகள் மீட்டுள்ளனர். குறித்த சீனப் பிரஜைகளைத் தமது பொறுப்பில் வைத்துள்ள சுங்க அதிகாரிகள் மேலதிக விசாரணைகளை முன்னெடுத்து வருகின்றனர்.

ஈரான் வெளியேற முயன்ற எண்ணெய் கப்பல்களை USA நிறுத்தியது.

டொனால்ட் டிரம்ப் உத்தரவிட்ட முற்றுகை அமலுக்கு வந்த பிறகு ஈரானை விட்டு வெளியேற முயன்ற இரண்டு எண்ணெய் கப்பல்களை ஒரு அமெரிக்கப் போர்க்கப்பல் வழிமறித்தது. 

வானொலி மூலம் கப்பல்களைத் தொடர்புகொண்டு திரும்பிச் செல்லுமாறு அறிவுறுத்தப்பட்ட இது, தொடர் மோதல்களுக்கு மத்தியில் ஹோர்முஸ் ஜலசந்தியில் பதற்றம் அதிகரித்து வருவதை எடுத்துக்காட்டுகிறது.

லெபனானுடனான ஒப்பந்தத்திற்கு இஸ்ரேல் காலக்கெடுவை நிர்ணயித்தது.!!

லெபனான் மற்றும் இஸ்ரேல் ஆகியவை நேரடியாக முதலாவது இராஜதந்திரப் பேச்சுவார்த்தைகளை நடத்தியது ஒரு முக்கியமான அரசியல் முன்னேற்றமாக பார்க்கப்படுகிறது. 

 இந்த பேச்சுவார்த்தைகள் பெரும்பாலும் எல்லை பிரச்சினைகள்—சிறப்பாக கடல் எல்லைகள் மற்றும் இயற்கை வளங்கள் (எ.கா. எரிவாயு களங்கள்)—பற்றிய விவாதங்களை மையமாகக் கொண்டதாகும்.

இந்த முயற்சிக்கு அமெரிக்கா மற்றும் ஐக்கிய நாடுகள் சபை போன்றவை நடுவர் மற்றும் ஆதரவாளர்களாக செயல்பட்டுள்ளன. இரு நாடுகளுக்கும் இடையில் அதிகாரப்பூர்வ அமைதி ஒப்பந்தம் இல்லாத நிலையிலும், இந்த பேச்சுவார்த்தைகள் எதிர்காலத்தில் நிலையான உறவை உருவாக்கும் முதல் படியாகக் கருதப்படுகின்றன. 

மேலும், இந்த நடவடிக்கை மத்திய கிழக்கு பகுதியில் பதற்றத்தை குறைக்கும் வாய்ப்பையும் உருவாக்குகிறது.

ஹிஸ்புல்லா பயங்கரவாதக் குழுவுடன் தொடர்புடைய லெபனானின் அல்-அக்பர் செய்தித்தாள், எல்லையில் நிலவும் பதற்றத்தைத் தணிப்பதற்கான ஒரு இராஜதந்திர உடன்படிக்கைக்கு இஸ்ரேல் காலக்கெடு நிர்ணயித்துள்ளதாகத் தெரிவித்துள்ளது. 

அந்த அறிக்கையின்படி, லெபனானுடன் ஒரு இராஜதந்திர உடன்படிக்கையை எட்டுவதற்கு மார்ச் 15 வரை காத்திருப்பதாக இஸ்ரேல் மேற்கத்திய நாடுகளுக்குத் தெரிவித்துள்ளது. 

மார்ச் 15-க்குள் அத்தகைய உடன்படிக்கை எட்டப்படாவிட்டால், லெபனானில் இஸ்ரேலிய பாதுகாப்புப் படையின் (IDF) நடவடிக்கைகளை ஒரு பெரும் போராக விரிவுபடுத்த இஸ்ரேல் தயாராகி வருகிறது.

இராணுவ ஆட்சேர்ப்புக்காக பல்கலைக்கழக மாணவர்- ரஷ்யா

ரஷ்ய பல்கலைக்கழகங்களில் உள்ள உயர் அதிகாரிகள் அனைவரும் தற்போது மாணவர்களைப் போருக்குச் செல்லுமாறு அழைப்பு விடுத்துள்ளதாக சர்வதேச ஊடகங்கள் விளக்கியுள்ளன. 

 பல்கலைக்கழகம் முழுவதும், ஆளில்லா விமானப் படைகளைப் பற்றிய சுவரொட்டிகள் எல்லா இடங்களிலும் ஒட்டப்பட்டுள்ளதாக அந்நாட்டு மாணவர்களின் அறிக்கைகளை மேற்கோள்காட்டி சர்வதேச ஊடகம் ஒன்று விளக்கியுள்ளது.

குறித்த தகவல்களும், பெருகிவரும் பொது ஆதாரங்களும், மாணவர்களைத் தனது ஆளில்லா விமானப் படையில் சேர ஈர்ப்பதற்கும் அழுத்தம் கொடுப்பதற்கும் ரஷ்யா ஒரு பிரசாரத்தை அமைதியாகத் தீவிரப்படுத்தி வருவதைச் சுட்டிக்காட்டுகின்றன. 

இந்த நடவடிக்கை ரஷ்யாவின் கல்வி அமைப்பில் பதற்றங்களை உருவாக்கும் அபாயத்தைக் கொண்டிருப்பதுடன், உக்ரைனில் நான்கு ஆண்டுகளாக நீடித்து வரும் போருக்கான ஆள்சேர்ப்பைத் தக்கவைப்பதில் மாஸ்கோ எதிர்கொள்ளும் வளர்ந்து வரும் சவால்களையும் வெளிப்படுத்துவதாக குறிப்பிடப்பட்டுள்ளது.

மாணவர்களை மையமாகக் கொண்ட இந்த நடவடிக்கை, மேலும் தீவிரமான ஆள்சேர்ப்பு உத்திகள் மீண்டும் அதிகரித்து வருவதற்கான பல அறிகுறிகளில் ஒன்றாகும் என்று நிபுணர்கள் கூறுகின்றனர்.

முல்லைத்தீவில் கிணற்றிலிருந்து சடலமாக மீட்கப்பட்ட பெண்

முல்லைத்தீவு புதுக்குடியிருப்பு காவல்துறை பிரிவிற்குட்பட்ட விசுவமடு தேராவில் பகுதியில் உள்ள பாதுகாப்பற்ற கிணறு ஒன்றிலிருந்து 52 வயதுடைய மூன்று பிள்ளைகளின் தாய் சடலமாக மீட்கப்பட்டவராவார்.

பிரித்தானியாவில் தரையிறங்கிய அமெரிக்க இராணுவ விமானம்!

அமெரிக்க விமானப்படைக்குச் சொந்தமான KC-135 ரக எரிபொருள் நிரப்பும் விமானம் ஒன்று, அதன் உடலில் ஏராளமான சிதறல் சேதங்களுடன் பிரித்தானியாவில் தரை இறங்கியுள்ளது. ஓஹியோ தேசிய காவல்படைக்குச் சொந்தமான இந்த நான்கு எஞ்சின் கொண்ட விமானம், லண்டனுக்கு வடக்கே உள்ள RAF Mildenhall விமான தளத்தில் தரை இறங்கியபோது எடுக்கப்பட்ட காணொளியில் அதன் உடல் முழுவதும் ஏராளமான ஒட்டுவேலைகள் நடந்திருப்பது தெரியவந்துள்ளது.

கடந்த மாதம் சவூதி அரேபியாவில் உள்ள இளவரசர் சுல்தான் விமான தளத்தின் மீது ஈரான் நடத்திய ஏவுகணைத் தாக்குதலின் போது, இந்த விமானம் அங்கு தரைதளத்தில் இருந்திருக்கலாம் என ஆய்வாளர்கள் கருதுகின்றனர்.அந்தத் தாக்குதலில் ஏற்கனவே அமெரிக்காவின் E-3 AWACS விமானம் ஒன்று அழிக்கப்பட்ட நிலையில், இந்த KC-135 விமானமும் அதன் அருகாமையில் இருந்து சேதமடைந்திருக்க வாய்ப்புள்ளதாகக் கூறப்படுகிறது.

இந்த ஒட்டுவேலைகள் வெடிகுண்டு சிதறல்களால் ஏற்பட்ட ஓட்டைகளை மறைக்கவே செய்யப்பட்டுள்ளன என்று பாதுகாப்புத்துறை ஆய்வாளர்கள் உறுதிபடத் தெரிவிக்கின்றனர்.

இதன்படி, பிரித்தானியாவில் குறித்த விமானம் தரையிரங்கிய மேற்படி விமான தளம் அமெரிக்காவின் 100-வது ரீஃபூயலிங் விங்கின் (100th Refueling Wing) மையம் என தெரியவருகிறது. இந்நிலையில், சம்பந்தப்பட்ட விமானத்தில் மேலதிக திருத்தப் பணிகளை மேற்கொள்வதற்காகவே அங்கு தரையிறக்கப்பட்டிருக்கலாம் என கருதப்படுகிறது.