நேட்டோ அமைப்பை உலுக்கிய அமெரிக்காவின் மிரட்டல்!

ஐரோப்பாவில் உள்ள அமெரிக்கப் படைகளின் நிலைநிறுத்தம் குறித்து ஒரு புதிய மறு ஆய்வை மேற்கொள்ளவுள்ளதாக அமெரிக்கப் பாதுகாப்புத்துறை அமைச்சர் பீட் ஹெக்செத் அதிகாரப்பூர்வமாக அறிவித்துள்ளார்.

பிரஸ்ஸல்ஸில் உள்ள நேட்டோ (NATO) தலைமையகத்தில் நடைபெற்ற பாதுகாப்பு அமைச்சர்கள் கூட்டத்தில் இது குறித்து அவர் கருத்து தெரிவித்துள்ளார். 

 இது தொடர்பில் மேலும் கருத்து தெரிவித்த அவர், தங்களின் பாதுகாப்புக்கான நிதி ஒதுக்கீட்டு இலக்குகளை முறையாக நிறைவேற்றாமல் இலவசப் பயணம் மேற்கொள்ளும் கூட்டணி நாடுகள், தங்களின் கடமைகளைச் சரிவர செய்யாவிட்டால் நேட்டோ அமைப்பிற்கு அமெரிக்கா வழங்க வேண்டிய நிதியின் ஒரு பகுதியை நிறுத்தி வைக்க நேரிடும் என்று எச்சரித்துள்ளார்.

சுமார் ஆறு மாதங்கள் வரை நீடிக்கவுள்ள இந்த இராணுவ மறு ஆய்வு, ஐரோப்பாவில் அமெரிக்கப் படைகளின் குறைந்தபட்ச எண்ணிக்கையைச் சட்டப்பூர்வமாக்கியுள்ள அமெரிக்க நாடாளுமன்றத்துடனான ஆலோசனைகளையும் உள்ளடக்கியிருக்கும் என்று அவர் குறிப்பிட்டுள்ளார்.

சமீபத்திய அமெரிக்க-ஈரான் போரின் போது அமெரிக்காவிற்குத் தங்களின் இராணுவத் தளங்களைப் பயன்படுத்தவும் வான்வழியாகப் பறக்கவும் அனுமதி மறுத்த சில நேட்டோ கூட்டணி நாடுகள் மீது ஹெக்செத் தனது கடுமையான அதிருப்தியை வெளிப்படுத்தியுள்ளார். இனிவரும் காலங்களில் அமெரிக்காவின் வான்வழி மற்றும் இராணுவத் தள உரிமைகள் உறுதி செய்யப்படுவதை இந்த புதிய மறு ஆய்வு நிலைநிறுத்தும் என்று அவர் குறிப்பிட்டுள்ளார்.

அத்தோடு நேட்டோ அமைப்பானது பனிப்போர் கால சிந்தனைகளிலிருந்து விடுபட்டு ஐரோப்பாவின் பாதுகாப்பிற்கு ஐரோப்பிய நாடுகளே முதன்மைப் பொறுப்பேற்கும் வகையில் நேட்டோ 3.0 என்ற வலுவான இராணுவக் கூட்டணியாக மாற வேண்டும் என்றும் அவர் வலியுறுத்தியுள்ளார்.

அமெரிக்காவில் பாலியல் சேவை இலங்கை பௌத்த பிக்கு கைது !!

அமெரிக்காவின் மாசாசூசெட்ஸ் மாநிலத்தில் உள்ள டஃப்ட்ஸ் பல்கலைக்கழகத்தில் (Tufts University) 2024 டிசம்பர் முதல் பௌத்த சாப்ளின் (Buddhist Chaplain) பதவியில் பணியாற்றிய இலங்கை பிக்கு மகாயாயே வினீத தேரர் (Rev. Mahayaye Vineetha Thero), 32 வயது, போஸ்டன் நகர காவல்துறையின் மனித கடத்தல் தடுப்புப் பிரிவினரால் கைது செய்யப்பட்டுள்ளார். 

இந்த கைது சம்பவம் ஜூன் 13 அன்று போஸ்டனின் பே வில்லேஜ் பகுதியில் உள்ள ரெவேர் கொட்டலில் (Revere Hotel) நடத்தப்பட்ட சோதனையின்போது நிகழ்ந்தது. இது “ஒபரேஷன் ரெட் கார்ட்” (Operation Red Card) என்ற பெயரிலான நடவடிக்கையின் ஒரு பகுதியாகும் — FIFA உலகக் கோப்பை போட்டிகள் போஸ்டன் பகுதியில் நடைபெறும் காலகட்டத்தில் பாலியல் கடத்தல் வலைப்பின்னல்களை முறியடிக்கும் நோக்கில் இந்நடவடிக்கை மேற்கொள்ளப்பட்டது. 

நடத்தைக்கு மாறாக, தேரர் வாணிபரீதியான பாலியல் சேவைகளை வழங்குவதாக போர்வேடமிட்டு இணையத்தில் விளம்பரம் செய்த போலீஸ் அதிகாரிகளின் (undercover officers) விளம்பரத்திற்கு பதிலளித்ததாக குற்றச்சாட்டு உள்ளது. 

மொத்தம் 7 பேர் கைது செய்யப்பட்டு, போஸ்டன் மத்திய நகர நீதிமன்றில் கட்டண அடிப்படையில் பாலியல் சேவை கோரியதற்காக (soliciting sex for a fee) குற்றம் சாட்டப்பட்டுள்ளனர். டஃட்ஸ் பல்கலைக்கழகம் திங்கட்கிழமை அவரது ராஜினாமாவைப் பெற்றதாக உறுதிப்படுத்தியது. 

பல்கலைக்கழக வலைத்தளத்திலும் அவரது பெயர் அகற்றப்பட்டுள்ளது. அவரது வழக்கறிஞர் இதுவரை பொதுவில் எந்தக் கருத்தும் தெரிவிக்கவில்லை. இந்தச் சம்பவம் இலங்கை, அமெரிக்கா மற்றும் சர்வதேச பௌத்த சமூகங்களில் பரவலான அதிர்ச்சியை ஏற்படுத்தியுள்ளது.

தெல்தெனிய காரொன்றிலிருந்து மருத்துவ பெண் சடலம்.

தனியார் விடுதி ஒன்றில் தங்கியிருந்த உடலியக்க மருத்துவர் ஒருவர் காரொன்றிலிருந்து இருந்து சடலமாக மீட்கப்பட்டுள்ளார். 

 இந்த சடலமானது தெல்தெனிய மருத்துவமனைக்கு அருகிலுள்ள வாகன நிறுத்துமிடத்தில் நேற்று (17) புதன்கிழமை மாலை மீட்கப்பட்டுள்ளதாக காவல்துறையினர் தெரிவித்துள்ளனர். உயிரிழந்தவர் வெலிகம - குருந்து கொரட்டுவ - பலல்ல பகுதியைச் சேர்ந்த 34 வயதுடைய பெண் என அடையாளம் காணப்பட்டுள்ளார்.

உயிரிழந்த பெண், தனது காதலன் எனக் கூறப்படும் நபருடன் நுவரெலியா பகுதியிலுள்ள தங்குமிடமொன்றிற்கு நேற்று முன்தினம் வருகை தந்திருந்தமை விசாரணைகளில் தெரியவந்துள்ளதாக காவல்துறை தெரிவித்துள்ளது.அந்தப் பெண்ணின் சடலத்தை காதலன் அன்றைய தினம் இரவே காரொன்றிலிருந்து ஏற்றி, நேற்று காலை தெல்தெனிய பகுதிக்குக் கொண்டு வந்திருக்கலாம் என சந்தேகிக்கப்படுவதாக காவல்துறை மேலும் தெரிவித்துள்ளது. 

இதேவேளை, குறித்த விடுதியிலிருந்து இரவு 10:30 மணியளவில் பெண்ணை தூக்கிச் சென்று காரொன்றில் ஏற்றி செல்லும் செயல்களைச் விடுதியில் பொருத்தப்பட்டிருந்த சிசிடிவி (CCTV) கேமரா காட்சிகளை அடிப்படையாகக் கொண்டு பெண்ணின் மூத்த சகோதரன் நுவரெலியா காவல் நிலையத்தில் முறைப்பாடு ஒன்றினை பதிவு செய்துள்ளார்.

பின்னர் காதலனே தெல்தெனிய காவல்துறையினருக்குத் தொலைபேசி அழைப்பை மேற்கொண்டு இத்தகவலை வழங்கியுள்ளமை ஆரம்பக்கட்ட விசாரணைகளில் வெளிப்பட்டுள்ளது.சந்தேகிக்கப்படும் காதலன் கன்னொருவ பகுதியைச் சேர்ந்தவர் என காவல்துறை குறிப்பிட்டுள்ள போதிலும், இதுவரை அவர் கைது செய்யப்படவில்லை.

இஸ்ரேல் ஒரு பயங்கரவாத அமைப்பிற்கு இணை!!

லெபனானில் இஸ்ரேல் நடத்தி வரும் ராணுவ தாக்குதல்கள் குறித்து அமெரிக்க அதிபர் டொனால்ட் ட்ரம்ப் வெளியிட்டுள்ள சமீபத்திய அறிக்கை, சர்வதேச அரசியலில் பெரும் புயலைக் கிளப்பியுள்ளது. 

இஸ்ரேலின் பிரதமர் பெஞ்சமின் நெதன்யாகுவின் பெயரை நேரடியாகக் குறிப்பிடவில்லை என்றாலும், இஸ்ரேலிய ராணுவத்தின் செயல்பாடுகளை அவர் விமர்சித்துள்ள விதம், இஸ்ரேலை ஒரு பயங்கரவாத அமைப்பிற்கு இணையாக அவர் மறைமுகமாகச் சித்தரித்துள்ளார் என்பது அப்பட்டமாக தெரிகிறது. 

டொனால்ட் ட்ரம்ப் தனது பேச்சில் மிக முக்கியமாகக் குறிப்பிட்ட விஷயம் இதுதான்: நீங்கள் தேடும் ஒரு நபர் (Hiz*bollah அமைப்பினர்) இருக்கிறார் என்பதற்காக, ஒவ்வொரு முறையும் ஒட்டுமொத்த அடுக்குமாடி குடியிருப்பையும் (குண்டுத்தாக்குதல் மூலம்) இடித்துத் தள்ள வேண்டிய அவசியமில்லை." பொதுவாக, பயங்கரவாத அமைப்புகள் தான் இலக்குகளைத் தாக்க முற்படும்போது அங்குள்ள பொதுமக்களின் உயிர்களைப் பற்றிக் கவலைப்படாமல் ஒட்டுமொத்த அழிவை ஏற்படுத்துவார்கள். 

இப்போது இஸ்ரேலும் அதையேதான் செய்கிறது என்பதை ட்ரம்ப் சுட்டிக்காட்டியுள்ளார். ஒரு பயங்கரவாதியை ஒழிப்பதற்காக, நூற்றுக்கணக்கான அப்பாவிப் பொதுமக்கள் வாழும் வீடுகளைத் குண்டு போட்டு தரைமட்டமாக்குவது எந்த வகையில் நியாயம் என்ற கேள்வியின் மூலம், இஸ்ரேலின் இந்தச் செயல்பாடு 'அரசு பயங்கரவாதம்' (State Terrorism) போன்றதே என்பதை ட்ரம்ப் மறைமுகமாக உணர்த்தியுள்ளார். 

இஸ்ரேல் தனது தாக்குதல்களை 'பயங்கரவாத எதிர்ப்பு நடவடிக்கை' (Counterterrorism Operation) என்று உலகிற்குச் சொல்லி வருகிறது. ஆனால், ட்ரம்பின் கருத்து இந்த வாதத்தை முற்றிலுமாக உடைக்கிறது. தாக்குதலுக்குள்ளாகும் கட்டிடங்களில் இருப்பவர்கள் அனைவரும் ஆயுதம் ஏந்தியவர்கள் அல்ல, அவர்கள் அப்பாவி மக்கள் என்று ட்ரம்ப் கூறியுள்ளார். 

ஒரு தனிநபரைத் தேடுவதற்காக ஒட்டுமொத்தப் பகுதியையும் அழிப்பது என்பது, அந்தச் சமூகத்தில் உள்ள அனைவருக்கும் கொடுக்கும் ஒரு கூட்டுத் தண்டனையாகும். ( Collective Punishment) சட்டத்திற்குப் புறம்பாக மக்களைக் கொன்று குவிக்கும் இத்தகைய உத்திகள், பொதுவாகப் பயங்கரவாத அமைப்புகளால் கையாளப்படுபவை ஆகும். இந்தக் கொடூரமான போர் உத்தி, சர்வதேச சமூகத்திற்கு "மீண்டும் ஒரு முள்ளிவாய்க்கால்" கண்முன்னே அரங்கேறி வருகிறதோ என்ற அச்சத்தை ஏற்படுத்தியுள்ளது. 

2009-ல் இலங்கையின் முள்ளிவாய்க்காலில் ஈழத் தமிழர்களுக்கு எதிராக இலங்கை ராணுவம் கையாண்ட அதே "பாதுகாப்பு வலய" (No Fire Zone) ஏமாற்று உத்தியைத்தான் இன்று லெபனானிலும், காசாவிலும் இஸ்ரேல் அரங்கேற்றி வருகிறது. 

அன்று விடுதலைப் புலிகளை ஒழிப்பதாகக் கூறிக்கொண்டு, மக்கள் அடர்த்தியாக வாழ்ந்த முள்ளிவாய்க்கால் பாதுகாப்பு வலயங்கள் மீது இலங்கை ராணுவம் கொத்துக் குண்டுகளையும் (Cluster Bombs), கனரக ஆயுதங்களையும் வீசி பல்லாயிரக்கணக்கான தமிழர்களைக் கொன்று குவித்தது. 

 இன்று இஸ்ரேலும் லெபனானில் அதே பாணியில் ஒட்டுமொத்த குடியிருப்பு வளாகங்களையும் தகர்த்து வருகிறது. முள்ளிவாய்க்காலில் தற்காலிக மருத்துவமனைகள் மற்றும் செஞ்சிலுவைச் சங்க வாகனங்கள் மீது இலங்கை ராணுவம் திட்டமிட்டுத் தாக்குதல் நடத்தியது.

 லெபனானிலும் தற்போது வரை 135-க்கும் மேற்பட்ட மருத்துவ மற்றும் மீட்புப் பணியாளர்களை இஸ்ரேல் கொன்றுள்ளது. முள்ளிவாய்க்காலில் பலியான லட்சக்கணக்கான தமிழர்களின் எண்ணிக்கையை இலங்கை அரசு மறைத்தது போல, லெபனானிலும் ஐநா மற்றும் சர்வதேச அமைப்புகளின் எச்சரிக்கைகளை மீறி இஸ்ரேல் எல்லையற்ற அழிவை ஏற்படுத்தி வருகிறது.

தற்போது வரை லெபனானில் 3,711-க்கும் அதிகமானோர் கொல்லப்பட்டுள்ளனர் (இதில் 353 பெண்களும், 247 குழந்தைகளும் அடங்குவர்). மேலும் 1.2 மில்லியனுக்கும் அதிகமான மக்கள் அகதிகளாக்கப்பட்டுள்ளனர். இன்று லெபனானில் நடப்பதைக் காட்டி, "இது பயங்கரவாத எதிர்ப்பு நடவடிக்கையா அல்லது கூட்டுத் தண்டனையா?" என ஐநாவை நோக்கி கேள்வி எழுப்ப வேண்டி உள்ளது. 

ஆனால், ஈழத்தில் நடந்தது வெறும் கூட்டுத் தண்டனை அல்ல; அது திட்டமிட்ட இனவழிப்பு (Genocide) ஆகும். இவ்விரண்டிற்கும் உள்ள வேறுபாட்டை நாம் புரிந்து கொள்ள வேண்டும்: கூட்டுத் தண்டனை (Collective Punishment) என்பது ஒரு குறிப்பிட்ட ஆயுதக் குழுவினரைத் தேடுவதற்காக, அந்தப் பகுதியில் உள்ள ஒட்டுமொத்த மக்கள் மீதும் தாக்குதல் நடத்தி, அவர்களின் வாழ்விடங்களை அழிப்பது. இனவழிப்பு (Genocide) என்பது ஒரு குறிப்பிட்ட தேசிய, இன, மத அல்லது மொழிச் சமூகத்தை முழுமையாகவோ அல்லது பகுதியாகவோ அழித்தொழிக்கும் நோக்கத்துடன் (Intent to destroy) திட்டமிட்டுச் செய்யப்படும் படுகொலைகள். 

முள்ளிவாய்க்காலில் நடந்தது பயங்கரவாதத்திற்கு எதிரான போரோ அல்லது தமிழர்களுக்கான கூட்டுத் தண்டனையோ அல்ல. அது தமிழர்கள் என்ற ஒரே காரணத்திற்காக, அவர்களின் தேசிய அடையாளத்தையும், இனத்தையும் அழிப்பதற்காக ஸ்ரீலங்கா அரசு சர்வதேச நாடுகளின் துணையோடு நடத்திய இனவழிப்பு (Genocide) ஆகும். முள்ளிவாய்க்கால் பேரவலம் நடந்து முடிந்து இத்தனை ஆண்டுகள் ஆகியும் ஈழத் தமிழர்களுக்கு இன்றுவரை சர்வதேச அரங்கில் நீதி கிடைக்காமல் இருப்பதற்கு முதன்மைக் காரணமே, இந்த கொடூரமான இனப்படுகொலையை சர்வதேச சமூகம் "பயங்கரவாதத்திற்கு எதிரான போர்" (War on Terror) என்றும், "கூட்டுத் தண்டனை" (Collective Punishment) என்றும் தவறாக வரையறுத்ததே ஆகும். 

காரணம் பாதுகாப்பு வலயங்களுக்குள் மக்களுடன் புலிகள் கலந்திருந்து போர் புரிந்தமை என்ற சாட்சிகளை முன்வைத்து கூட்டுத்தண்டனை ( collective punishment) என பூசி மெழுக முற்படுகின்றனர். சர்வதேச சட்டங்களின்படி, ஒரு போரில் நடக்கும் மனித உரிமை மீறல்களையோ அல்லது கூட்டுத் தண்டனைகளையோ "போர்க்குற்றங்கள்" (War Crimes) என்ற சாதாரணப் பிரிவின் கீழ் கொண்டுவந்து, சில தளர்வுகளுடன் கடந்து சென்றுவிட முடியும். இதைப் பயன்படுத்திக் கொண்டுதான், வல்லரசு நாடுகளும் ஐநாவும் முள்ளிவாய்க்காலை ஒரு 'இனப்படுகொலை' என்று அங்கீகரிக்கத் தயங்குகின்றன. 

முள்ளிவாய்க்காலை வெறும் 'போர்க்குற்றம்' அல்லது 'கூட்டுத் தண்டனை' என்று சுருக்குவது, குற்றவாளிகளான இலங்கை ஆட்சியாளர்களையும், ராணுவ அதிகாரிகளையும் சர்வதேச நீதிமன்றத்தின் (ICC) கடுமையான தண்டனைகளில் இருந்து பாதுகாப்பதற்கே உதவும். 

இதுவே தமிழர்களுக்கான நீதி இன்னமும் கிடைக்காமல் இழுத்தடிக்கப்படுவதற்குக் பின்னணியில் உள்ள கசப்பான அரசியல் உண்மை. லெபனானில் இன்று இஸ்ரேல் செய்யும் கொடூரங்களுக்கும், அன்று முள்ளிவாய்க்காலில் தமிழர்களுக்கு நேர்ந்த கொடுமைகளுக்கும் உள்ள ஒற்றுமை வெறும் தற்செயலானது அல்ல. 

 ஏனெனில், இலங்கை ராணுவத்திற்கு இத்தகைய கொடூரமான போர் உத்திகளையும், மனிதநேயமற்ற தாக்குதல் முறைகளையும் கற்றுக்கொடுத்ததே இதே இஸ்ரேல் தான் என்பது வரலாற்று உண்மை. சுருக்கமாகக் கூறின், அன்று முள்ளிவாய்க்காலில் தமிழர்களைக் கொன்றுகுவிக்க இலங்கை ராணுவ பயங்கரவாதத்திற்குப் பயிற்சியும் ஆயுதமும் அளித்த அதே இஸ்ரேல், இன்று அதே உத்திகளை லெபனான் மக்கள் மீது பிரயோகித்து வருகிறது. 

அன்று சர்வதேச சமூகம் முள்ளிவாய்க்காலை "பயங்கரவாத ஒழிப்பு" என்று நம்பி மௌனம் காத்ததன் விளைவைத்தான், இன்று லெபனான் மக்கள் "மீண்டும் ஒரு முள்ளிவாய்க்கால்" வடிவில் அனுபவித்துக் கொண்டிருக்கிறார்கள். 

 தற்போதாவது டொனால்ட் ட்ரம்பின் கருத்துக்கள் மூலம் இஸ்ரேலின் கொடூர முகம் அம்பலமாகியிருப்பது உலகிற்கு ஒரு எச்சரிக்கையாகும்.

முகின்தன் துரைராஜசிங்கம்

லண்டன்

டிரம்ப் ஈரான் அமைதித் திட்டத்தில் கையெழுத்திட்டார்.

டொனால்ட் டிரம்ப் ஈரானுடன் 14 அம்ச ஒப்பந்தத்தில் கையெழுத்திட்டுள்ளார். இது அமெரிக்காவிற்கு ஒரு "பெரும் வெற்றியை" அளித்துள்ளது என்று அவர் கூறியுள்ளார். அதே சமயம், ஹோர்முஸ் ஜலசந்தியை மீண்டும் திறப்பதற்கும், ஒரு "உலகளாவிய பொருளாதார மந்தநிலையை" தடுப்பதற்கும் ஈரானுக்கு குறிப்பிடத்தக்க அரசியல் மற்றும் நிதி ரீதியான சலுகைகளை அவர் வழங்கியுள்ளார். 

புதன்கிழமையன்று தனது அசாதாரணமான கருத்துக்களில், டொனால்ட் டிரம்ப், ஈரானை ஒரு புதிய அலைத் தாக்குதல்களால் அச்சுறுத்துவதிலிருந்து, குடிமைப் பயன்பாட்டிற்காக யுரேனியத்தைச் செறிவூட்டுவதற்கு அந்நாட்டிற்கு அடிப்படை உரிமைகள் உள்ளன என்றும், தனது பாலிஸ்டிக் ஏவுகணைத் திட்டத்தைக் கைவிடுமாறு தெஹ்ரானுக்கு அழுத்தம் கொடுக்க மாட்டேன் என்றும், முடக்கப்பட்ட ஈரானிய சொத்துக்களில் பில்லியன் கணக்கான டாலர்களை அமெரிக்கா "திரும்பக் கொடுக்க வேண்டியிருக்கும்" என்றும் குறிப்பிட்டார். 

 ஹிஸ்புல்லா தலைவர் நைம் காசிம் அவர்களால் "ஒரு மாபெரும் வெற்றி" என்று பாராட்டப்பட்ட இந்த ஒப்பந்தத்தின் முழு உரையும், இந்தக் கருத்துக்களும் இஸ்ரேலிலும், தெஹ்ரானுடன் ஒப்பந்தம் செய்ய வேண்டாம் என்று டிரம்பை வலியுறுத்திய குடியரசுக் கட்சியின் தீவிரவாதிகளிடையேயும் கோபத்தைத் தூண்டக்கூடும். ஈரானின் ஜனாதிபதி மசூத் பெஷெஷ்கியன், புதன்கிழமையன்று தெஹ்ரானில் இருந்து இந்த ஒப்பந்தத்தில் கையெழுத்திட்டார்.

 அமெரிக்கத் துணை அதிபர் ஜே.டி. வேன்ஸும், வெள்ளிக்கிழமை ஜெனீவாவில் நடைபெறும் ஒரு முறையான விழாவில் இந்த ஒப்பந்தத்தில் கையெழுத்திடுவார் என எதிர்பார்க்கப்படுகிறது. ஈரானின் தலைமைப் பேச்சுவார்த்தையாளர் முகமது பாகர் காலிபாஃப், “இந்த ஒப்பந்தம் அமெரிக்காவின் தோல்வியின் ஒரு பதிவாகும்.

மக்கள் இதைப் பார்த்துத் தீர்ப்பளிப்பார்கள்,” என்று கூறினார். இந்த ஒப்பந்தத்தை ஆதரித்துப் பேசிய டிரம்ப், தன்னைப்போல் எந்த அமெரிக்க அதிபரும் ஈரானிடம் இவ்வளவு கடுமையாக நடந்துகொண்டதில்லை என்றும், “சந்தையைப் போல் புத்திசாலித்தனமானது வேறு எதுவும் இல்லை – மேலும் சந்தை அதை விரும்புகிறது” என்றும் கூறினார். 

 “இதற்கு மாற்று வழி உலகளாவிய பொருளாதார மந்தநிலையாக இருந்திருக்கும்” என்று கூறிய டிரம்ப், தான் இந்த ஒப்பந்தத்தைச் செய்திருக்காவிட்டால், “[ஹோர்முஸ்] ஜலசந்தி ஒருபோதும் திறக்கப்பட்டிருக்காது. அவர்களின் ராக்கெட்டுகள் தலைக்கு மேல் பறக்கும்போதும், எல்லா இடங்களிலும் கண்ணிவெடிகள் இருக்கும்போதும், பில்லியன் டாலர் மதிப்புள்ள கப்பல்கள் அந்த ஜலசந்தியில் மேலும் கீழும் செல்வதை அவர்கள் விரும்புவதில்லை,” என்று வாதிட்டார். 

 ஈரான் அணு ஆயுதம் பெறுவதைத் தடுக்க இந்த ஒப்பந்தம் உதவும் என்று மூத்த நிர்வாக அதிகாரிகள் தெரிவித்தனர். மேலும், ஈரானின் 440 கிலோ எடையுள்ள ஆயுதங்களைக் குறைப்பது குறித்து விவாதிப்பதற்கான ஒரு ஒப்பந்தத்தையும் அவர்கள் சுட்டிக்காட்டினர்.

சர்வதேச அணுசக்தி முகமையின் மேற்பார்வையின் கீழ், ஈரானுக்குள்ளேயே இந்தக் கையிருப்பை நீர்த்துப்போகச் செய்வதற்குத் தான் தயாராக இருப்பதாக டிரம்ப் கூறியுள்ளார்.

கொட்டக்கலை திருமண மண்டபத்தில் மோதல் !!

கொட்டக்கலை  திருமண மண்டபம் ஒன்றில் இரு குழுவினரிடைய ஏற்பட்ட மோதலைத் தடுக்கச் சென்ற பொலிஸார் மீது தாக்குதல் நடத்தப்பட்டுள்ளது. கொட்டக்கலை நகரில் உள்ள திருமண மண்டபம் ஒன்றில் தலவாக்கலை வட்டக்கொடை பகுதியைச் சேர்ந்தவர்களால் திருமண விழா ஒன்று இன்று மாலை ஏற்பாடு செய்யப்பட்டிருந்தது. 

இந்த நிகழ்வில் பங்கேற்பதற்காக வந்தவர்களில் மதுபோதையில் இருந்த இரு குழுவினரிடையே ஏற்பட்ட வாய்த்தர்க்கம் பின்னர் மோதலாக மாறியுள்ளது. தகவலறிந்த பொலிஸார் உடனடியாக அங்கு விரைந்து அந்த குழுவினரை சமாதானப்படுத்த முற்பட்டுள்ளனர். இதன்போது மோதலில் ஈடுபட்டிருந்த குழுவினரால், அங்கு சமாதானத்தில் ஈடுபட்ட பொலிஸார் மீது தாக்குதல் நடத்தப்பட்டுள்ளது. 

 சம்பவத்தில் இரண்டு பொலிஸ் உத்தியோகத்தர்கள் காயமடைந்தனர். இரண்டு பொலிஸ் அதிகாரிகளும் கொட்டக்கலை பிராந்திய வைத்தியசாலையில் அனுமதிக்கப்பட்டுள்ளனர் அதனை தொடர்ந்து திம்புள்ள பத்தனை பொலிஸ் நிலையத்தில் இருந்து மேலும் ஒரு பொலிஸ் குழுவினர் சம்பவ இடத்திற்கு விரைந்து தாக்குதலை நடத்திய ஏழு பேரை பாரிய சிரமத்திற்கு மத்தியில் கைது செய்தனர்.

பொலிஸ் உத்தியோகத்தர்கள் தாக்கப்படுவதை நேரில் கண்ட பிரதேசமக்கள், தாக்குதலில் ஈடுபட்ட சந்தேக நபர்களைக் கைது செய்வதற்கு பொலிஸாருக்கு ஒத்துழைப்பு வழங்கியுள்ளனர். 

 சம்பவத்தில் காயமடைந்த இரண்டு பொலிஸ் உத்தியோகத்தர்களும், மோதலில் காயமடைந்த மேலும் மூவரும் சிகிச்சைகளுக்காக கொட்டகலை வைத்தியசாலையில் அனுமதிக்கப்பட்டுள்ளனர்.

இங்கிலாந்து எண்ணெய் கப்பலைக் கைப்பற்றியதற்கு ரஷ்யா பதிலடி கொடுக்கும் !!

கேப்டன்களுக்கோ அல்லது கப்பல் உரிமையாளர்களுக்கோ முறையான எச்சரிக்கை எதுவும் விடுக்கப்படவில்லை, ஆனால் தாங்கள் மிகுந்த விழிப்புடன் இருப்பதாகத் தொழில் துறை அமைப்பு தெரிவிக்கிறது.

ராயல் மரைன்ஸ் படையினர் ஸ்மிர்டோஸ் என்ற எண்ணெய் கப்பலைக் கைப்பற்றியதற்குப் பதிலடி கொடுக்க ரஷ்யா முயற்சிக்கும் என்று பிரிட்டிஷ் அதிகாரிகள் நம்புவதால், மாஸ்கோவுடனான பதற்றம் தணியும் வரை இங்கிலாந்து கப்பல் உரிமையாளர்கள் மிகுந்த எச்சரிக்கையுடன் இருக்குமாறு அறிவுறுத்தப்பட்டுள்ளனர். 

40 மில்லியன் டாலர் (30 மில்லியன் பவுண்ட்) மதிப்புள்ள ரஷ்ய கச்சா எண்ணெயை இந்தியாவிற்கு ஏற்றிச் சென்ற கப்பலைக் கைப்பற்றியதற்கு சாத்தியமான பதிலடிகள் குறித்து இங்கிலாந்து பரிசீலித்து வருவதாகவும், கிரெம்ளின் பதிலடி கொடுக்க விரும்பும் என்று எதிர்பார்ப்பதாகவும் இராணுவ வட்டாரங்கள் தெரிவித்தன. 

 "ஸ்மிர்டோஸ் கப்பலைக் கைப்பற்றும் திட்டம் நீண்ட காலமாகவே இருந்து வந்தது. அவர்கள் அதற்கான அபாயங்களை ஆராய்ந்திருந்தனர், மேலும் ரஷ்யா பதிலடி கொடுக்க முயற்சிக்கும் என்று எதிர்பார்க்கப்படுகிறது," என்று ஒரு கடற்படை உள்வட்டார நபர் கூறினார். 

"அவர்கள் அவ்வாறு செய்தால், அது உலகளாவிய அளவில் இருக்கலாம். அவர்கள் அவசரப்படாமல், சரியான தருணத்தைத் தேர்ந்தெடுத்துச் செயல்பட வாய்ப்புள்ளது." பிரிட்டிஷ் கப்பல் தலைவர்களுக்கும் உரிமையாளர்களுக்கும் முறையான எச்சரிக்கை எதுவும் விடுக்கப்படவில்லை, ஆனால் இந்தத் துறையைப் பிரதிநிதித்துவப்படுத்தும் இங்கிலாந்து கப்பல் வர்த்தக சபை, ரஷ்யாவின் பதிலடி நடவடிக்கைக்கான அபாயம் இருக்கலாம் என்ற புரிதல் இருப்பதாகக் கூறியது.

 "அதிகரித்துள்ள அபாயம் குறித்து நாங்கள் அறிந்திருக்கிறோம், மேலும் உரிமையாளர்கள் தாங்களாகவே அபாயத்தை மதிப்பிடுகிறார்கள்," என்று ஒரு செய்தித் தொடர்பாளர் கூறினார். "கடந்த சில நாட்களின் நிகழ்வுகளைக் கருத்தில் கொண்டு, தொழில்துறையின் கண்ணோட்டத்தில், அதிக கண்காணிப்பு நிலவுகிறது.

" பிரிட்டிஷ் பிரதமர் கெய்ர் ஸ்டார்மரின் உத்தரவின் பேரில், ஞாயிற்றுக்கிழமை அதிகாலை வேளையில், ஐல் ஆஃப் வைட் தீவிலிருந்து 25 மைல்கள் (40 கி.மீ.) தெற்கே பயணித்துக் கொண்டிருந்த ஸ்மிர்டோஸ் கப்பல் கைப்பற்றப்பட்டது. அதன் இந்திய கேப்டன் மீது ரஷ்யா மீதான இங்கிலாந்து தடைகளை மீறியதாகக் குற்றம் சாட்டப்பட்டுள்ளது.