யாழ். நகரில் உள்ள பிரபல நகைக்கடை ஒன்றில் பணியாற்றிய பெண் ஒருவர், சுமார் 2 கிலோ கிராம் தங்க நகைகளைக் கொள்ளையிட்ட குற்றச்சாட்டில் கைது செய்யப்பட்டு விளக்கமறியலில் வைக்கப்பட்டுள்ளார்.
கடந்த ஒன்றரை வருடங்களாக நகைகளுக்குப் பொறுப்பான அதிகாரியாகப் பணியாற்றிய இப்பெண், நிர்வாகத்திற்குச் சந்தேகம் வராதவாறு சிறுகச் சிறுக நகைகளைத் திருடி வந்துள்ளார்.
மூன்று மாதங்களுக்கு முன்பு தனக்குத் திருமணம் நிச்சயமாகிவிட்டதாகக் கூறி, வேலையிலிருந்து விலகியுள்ளார். இது நிர்வாகத்தின் சந்தேகத்தைத் தவிர்க்க அவர் எடுத்த முயற்சியாகப் பார்க்கப்படுகிறது.
அண்மையில் கடையில் நடத்தப்பட்ட வருடாந்த கணக்கெடுப்பின் போதே 10 கோடி ரூபாய் பெறுமதியான நகைகள் மாயமானது கண்டுபிடிக்கப்பட்டது.
யாழ்ப்பாணம் காவல்துறையினர் நடத்திய விசாரணையில், குறித்த பெண் தனது குற்றத்தை ஒப்புக்கொண்டுள்ளார்.
திருடிய நகைகளை அவர் மூன்று வழிகளில் கையாண்டுள்ளார்:
பல்வேறு இடங்களில் அடகு வைத்துள்ளதுடன் வேறு சில நபர்களிடம் விற்பனை செய்துள்ளார்.மிக முக்கியமான சில நகைகளைத் தனது வீட்டின் நிலத்தினுள் புதைத்து வைத்துள்ளார்.
இன்று செவ்வாய்க்கிழமை யாழ். நீதவான் நீதிமன்றில் முற்படுத்தப்பட்ட இந்தப் பெண்ணை, எதிர்வரும் ஜனவரி 27, 2026 வரை விளக்கமறியலில் வைக்குமாறு நீதவான் உத்தரவிட்டுள்ளார்.
அந்தப் பெண்ணின் வீட்டு வளவினுள் புதைக்கப்பட்டிருந்த சில நகைகளை காவல்துறையினர் ஏற்கனவே அடையாளப்படுத்தியுள்ளனர். அவற்றை அகழ்ந்து எடுப்பதற்கான விசேட நடவடிக்கைகள் நீதிமன்ற அனுமதியுடன் முன்னெடுக்கப்படவுள்ளன.
யாழ்ப்பாண நகரின் பல்வேறு பகுதிகளில் உள்ள நிதி நிறுவனங்கள் மற்றும் அடகு நிலையங்களில் அந்தப் பெண் நகைகளை அடகு வைத்துள்ளமை கண்டறியப்பட்டுள்ளது.
அந்த நகைகளை மீட்பதற்கான சட்ட நடவடிக்கைகளை காவல்துறையினர் ஆரம்பித்துள்ளனர்.
குறித்த பெண் திருடிய நகைகளை விற்பனை செய்வதற்கும், அடகு வைப்பதற்கும் அவருக்கு நெருக்கமான சிலர் உதவியுள்ளதாகச் சந்தேகிக்கப்படுகிறது.
குறிப்பாக, நகைக்கடை உரிமையாளர்களுக்குச் சந்தேகம் வராதவாறு கணக்குப் பதிவுகளை மாற்றியமைக்க யாராவது உதவினார்களா என்பது குறித்தும் கணினி தடயவியல் (Computer Forensics) சோதனைகள் நடத்தப்படவுள்ளன.
இந்தச் சம்பவத்தைத் தொடர்ந்து, யாழ். நகரில் உள்ள ஏனைய நகைக்கடை உரிமையாளர்களும் தங்களது ஊழியர்கள் மற்றும் இருப்பு (Stock) விபரங்கள் குறித்து விழிப்புடன் இருக்குமாறு காவல்துறையினர் அறிவுறுத்தியுள்ளனர்.
கருத்துகள் இல்லை:
கருத்துரையிடுக