சர்வதேச சைபர் மாஃபியா கும்பல்களின் புகலிடமாகும் இலங்கை!!

இலங்கையின் தெற்குக் கடற்கரையோர சொகுசு பங்களா ஒன்றின் கதவுகள் எப்போதும் பூட்டப்பட்டே இருந்தன. உள்ளே 24 மணிநேரமும் குளிரூட்டி இயங்கியதுடன், நள்ளிரவிலும் கணினித் திரைகளின் வெளிச்சம் அறைகளை நிறைத்திருந்தது. அங்கு தங்கியிருந்த வெளிநாட்டுப் பிரஜைகள் எவரும் சுற்றுலாத் தலங்களை ரசிக்க வெளியே வரவில்லை. 

"மாதத்திற்கு ஐந்து லட்சம் ரூபாய் வாடகை தருகிறோம் என்று முன்பணத்துடன் வந்தபோது எனக்கு எந்தச் சந்தேகமும் வரவில்லை," என்கிறார் இலங்கையின் தென்பகுதியில் தனது சொகுசு பங்களாவை வெளிநாட்டவர்களுக்கு வாடகைக்கு விட்ட வீட்டு உரிமையாளர் ஒருவர். பாதுகாப்புக் காரணங்களுக்காகத் தனது பெயரை வெளிப்படுத்த விரும்பாத அவர், பிபிசி தமிழிடம் தனது அதிர்ச்சியைப் பகிர்ந்துகொண்டார்:

 "சுற்றுலாப் பயணிகள் என்றுதான் கூறினார்கள். ஆனால், காவல்துறையினர் எனது வீட்டைச் சோதனையிட்டபோதுதான், உலகளாவிய இணையதள மோசடி வலையமைப்பு ஒன்று எனது வீட்டிற்குள் இயங்கிய அதிர்ச்சி உண்மை எனக்குத் தெரிந்தது. 

இப்போது விசாரணை, நீதிமன்றம் என்று எனது குடும்பமே அச்சத்தில் உள்ளது" என்கிறார் அவர். இது ஏதோ ஒரு தனிப்பட்ட வீட்டின் கதையல்ல. இலங்கை தற்போது முன்னெப்போதும் இல்லாத வகையில் சர்வதேச சைபர் குற்றச் செயல்களின் பாரிய அச்சுறுத்தலை எதிர்கொண்டுள்ளது என்பதற்கான நேரடிச் சான்று. 

ஆயிரம் பேர் கைது ஆசியாவின் பிற பகுதிகளில் இருந்து விரட்டப்பட்ட அதிநெருக்கடி மிக்க இணைய மோசடிக் கும்பல்கள், இலங்கையைத் தங்களின் முதன்மைச் செயல்பாட்டுத் தளமாக மாற்றி வருவதாக விசாரணை அதிகாரிகள் குறிப்பிடுகின்றனர். இதன் உச்சகட்டமாக, தெற்கு மாகாணத்தின் மிதிகம, ஹிக்கடுவ, காலி ஆகிய பகுதிகளில் அதிகளவான கைதுகள் இடம்பெற்றுள்ளன. 

இலங்கை காவல்துறையினரால் உத்தியோகபூர்வமாக உறுதிப்படுத்தப்பட்ட இறுதிப் புள்ளிவிவரங்களின்படி, 2026 ஜனவரி முதல் மே மாத இறுதி வரையிலான காலப்பகுதியில் மட்டும் சைபர் குற்றங்கள் மற்றும் விசா விதிமீறல்கள் தொடர்பாகக் கைது செய்யப்பட்ட ஒட்டுமொத்த வெளிநாட்டுப் பிரஜைகளின் எண்ணிக்கை 1,000ஐ தாண்டியுள்ளது. 

கடந்த 2024ஆம் ஆண்டு முழுவதுமே இக்குற்றச்சாட்டில் 430 பேர் மட்டுமே கைதாகியிருந்தனர். தொடர்ந்து 2025ஆம் ஆண்டில் இணைய நிதி மோசடிகள் மற்றும் சைபர் குற்றங்கள் தொடர்பாக 12,650க்கும் அதிகமான முறைப்பாடுகள் பதிவாகி அச்சுறுத்தல் அதிகரித்திருந்த பின்னணியில், 2026இல் இந்தக் கைதுகளின் எண்ணிக்கை முன்னெப்பொழுதும் இல்லாதவாறு பாரிய நெருக்கடியாக உருவெடுத்துள்ளதை இது காட்டுகிறது. 

இலங்கை காவல்துறை பகிர்ந்த தகவல்களின் படி, மே மாதத்தின் இரண்டாவது வாரத்தில் தென்னிலங்கையில் நடத்தப்பட்ட 5 அதிரடிச் சோதனைகளில் 173 முதல் 192 வரையான இந்திய பிரஜைகள் கைது செய்யப்பட்டுள்ளனர். காலி பகுதியில் மட்டும் இரு விடுதிகளில் 110 இந்தியர்களும், மிதிகமவில் 28 பேரும், ஹிக்கடுவவில் 35 பேரும் கைதாகியுள்ளனர். 

மார்ச் மாதத்தில் மிகிந்தலை மற்றும் அனுராதபுரத்தில் ஒரே நாளில் 135 சீனப் பிரஜைகளும், ஏப்ரல் தொடக்கத்தில் சிலாபத்தில் 133 சீனர்களும் கைது செய்யப்பட்டுள்ளனர். பிப்ரவரியில் கொழும்பு கறுவாத்தோட்டத்தில் 21 பேரும் கைதாகினர். 

கொழும்பு கொள்ளுப்பிட்டி, கொம்பனித்தெரு ஸ்ரீ உத்தரானந்த மாவத்தையில் உள்ள அடுக்குமாடிக் குடியிருப்பு ஒன்றில் மே 6 அன்று ஒரே சோதனையில் 74 வியட்நாம் பிரஜைகள் கைது செய்யப்பட்டனர். இவர்களுடன் நேபாளம், மியான்மர், பிலிப்பின்ஸ், மலேசியா, தைவான், இந்தோனீசியா (77 பேர்) ஆகிய நாடுகளைச் சேர்ந்த பிரஜைகளும் கைது செய்யப்பட்டுள்ளனர். 

இவர்களிடம் இருந்து 500க்கும் மேற்பட்ட அதிநவீன கணினிகள்/மடிக்கணினிகள், ஆயிரத்திற்கும் மேற்பட்ட ஸ்மார்ட்போன்கள் மற்றும் மில்லியன் கணக்கான உள்ளூர், வெளிநாட்டு கரன்சிக்கள் பொலிஸாரால் பறிமுதல் செய்யப்பட்டுள்ளன. உள்நாட்டு சட்டங்கள் இன்னும் வரைவு நிலையில் இருக்கும் சூழலில், எல்லை கடந்த இந்த சைபர் மாஃபியாக்களை ஒடுக்குவதற்கு சர்வதேச நாடுகளின் கூட்டு உதவி அவசியம் என்பதை இலங்கை உணர்ந்துள்ளது. 

இதற்கமைய, வியட்நாமிய தலைநகர் ஹனோயில் நடைபெற்ற ஐநா-வின் உத்தியோகபூர்வ மாநாட்டில், 'சைபர் குற்றங்களுக்கு எதிரான ஐக்கிய நாடுகள் சாசனத்தில்' (UN Cybercrime Convention) இலங்கை முறைப்படி கைச்சாத்திட்டுள்ளது. 

இதன் மூலம், வெளிநாட்டு வலையமைப்பிற்கு டிஜிட்டல் தடயங்களை சர்வதேச புலனாய்வு அமைப்புகளுடன் உடனுக்குடன் பகிர்ந்துகொள்ளவும், குற்றவாளிகளை அந்தந்த நாடுகளுக்குத் துரிதமாக நாடு கடத்தவும் இலங்கைக்கு சர்வதேச சட்ட பலம் கிடைக்கிறது. 

இந்நிலையில், கொழும்பில் நடைபெற்ற விசேட செய்தியாளர் சந்திப்பில் பொலிஸ் ஊடகப் பேச்சாளர் பிரெட்ரிக் வூட்லர் மூன்று முக்கிய அறிவிப்புகளை வெளியிட்டார். அதில், "கைது செய்யப்படும் வெளிநாட்டுச் சந்தேக நபர்கள் உடனடியாக நாடுகடத்தப்பட மாட்டார்கள். 

அவர்கள் அனைவரும் சுற்றுலா விசா ஒழுங்குவிதிகளை மீறி, சட்டவிரோதமாகப் பணிபுரிந்து விசா காலத்தையும் மீறி தங்கியுள்ளனர். இவர்கள் கணினி குற்றங்கள் சட்டத்தின் கீழ் நீதிமன்றில் முன்னிலைப்படுத்தப்பட்டு, பறிமுதல் செய்யப்பட்ட சாதனங்கள் கொழும்பு நீதவான் உத்தரவின் பேரில் தடயவியல் சோதனைக்கு உட்படுத்தப்பட்ட பின்னரே நாடுகடத்தல் பற்றித் தீர்மானிக்கப்படும். 

மோசடிக் கும்பல்களுக்கு இடமளிக்கும் சொத்து உரிமையாளர்கள், குற்றச் செயல்களுக்குத் துணை நின்ற குற்றச்சாட்டின் கீழ் கடுமையான சட்ட நடவடிக்கைகளை எதிர்கொள்வர். பொலிஸ் கட்டளை சட்டத்தின் 76வது பிரிவின்படி, தற்காலிக குடியிருப்பாளர்களின் விவரங்களை அருகில் உள்ள பொலிஸ் நிலையத்தில் பதிவு செய்வது கட்டாயமாகும்" என்று தெரிவிக்கப்பட்டுள்ளது. 

அதோடு, "இலங்கையின் திறைசேரி (கருவூலம்) மீது அண்மையில் நடத்தப்பட்டு, சுமார் 2.5 மில்லியன் அமெரிக்க டாலர்கள் இழப்பை ஏற்படுத்திய பாரிய சைபர் தாக்குதலுக்கும், தற்போது பிடிபட்டுள்ள சர்வதேச சைபர் மோசடிக் கும்பல்களுக்கும் ஏதேனும் பின்னணித் தொடர்பு உள்ளதா என்பது குறித்தும் தீவிர புலனாய்வு விசாரணைகள் ஆரம்பிக்கப்பட்டுள்ளன" என்றும் அறிவிக்கப்பட்டுள்ளது. 

இலங்கையில் கைது செய்யப்படுவோரில் கணிசமானோர் சீனப் பிரஜைகளாக உள்ள நிலையில், கொழும்பில் உள்ள சீனத் தூதரகம் இதுகுறித்து உத்தியோகபூர்வ அறிக்கை ஒன்றை வெளியிட்டுள்ளது.

 எல்லையைக் கடந்த இணைய சூதாட்டமும், தொலைத்தொடர்பு மோசடிகளும் சர்வதேச அளவிலான ஒரு திட்டமிடப்பட்ட குற்றவியல் வடிவமாக உருவெடுத்துள்ளதாக ஐக்கிய நாடுகளின் போதைப்பொருள் மற்றும் குற்றங்களுக்கான அலுவலகம் சுட்டிக்காட்டியுள்ளதை சீனத் தூதரகம் நினைவு கூர்ந்துள்ளது. 

சீனத் தூதரகம் விடுத்துள்ள உத்தியோகபூர்வ அறிவிப்பில், "எல்லையைக் கடந்த சூதாட்டம் குறித்த சீன அரசின் நிலைப்பாடு மிகவும் தெளிவானதும் உறுதியானதுமாகும். சீன மூலதனத்தை வெளிநாட்டு சூதாட்ட விடுதிகளில் முதலீடு செய்யக்கூடாது, சீனக் குடிமக்கள் வெளிநாட்டு சூதாட்ட விடுதிகளை இயக்குவதில் பங்கேற்கக் கூடாது.

இத்தகைய நடவடிக்கைகள் மோசடி, பணமோசடி, கடத்தல், மனிதக் கடத்தல், சட்டவிரோதமாக எல்லை தாண்டுதல் போன்ற பிற குற்றங்களுக்கும் வழிவகுக்கின்றன. சீன குற்றவியல் சட்டத்தின் புதிய திருத்தங்கள், எல்லையைக் கடந்த சூதாட்ட நடவடிக்கைகளைக் குற்றவியல் செயலாக அறிவித்துள்ளன" என்று தெரிவித்துள்ளது.

செம்மணியில் 6 சிறுவர்களின் என்புக்கூடுகள்!!

யாழ் செம்மணி மனித புதைகுழியில் முன்னெடுக்கப்பட்டு வரும் மூன்றாம் கட்ட அகழ்வு பணிகளில் இன்று (திங்கட்கிழமை) மேலும் அதிர்ச்சியூட்டும் தகவல்கள் வெளிச்சத்துக்கு வந்துள்ளன. 

இன்றைய 19ஆம் நாள் அகழ்வுப் பணிகளின் போது சிறுவர்களின் என்புக்கூடுகள் அடங்கிய 06 மனித என்புக் கூட்டு தொகுதிகள் ஒரே இடத்தில் குவியலாக அடையாளம் காணப்பட்டுள்ளதாக நீதிமன்ற கண்காணிப்பில் பணிகளை முன்னெடுத்து வரும் தரப்புகள் தெரிவித்துள்ளன. 

அடையாளம் காணப்பட்ட என்புக்கூடுகளை சுத்தம் செய்து, விஞ்ஞான மற்றும் தடயவியல் ஆய்வுகளுக்காக பாதுகாப்பாக பதிவு செய்யும் பணிகள் தொடர்ந்து இடம்பெற்று வருகின்றன. மேலும், இன்றைய தினம் மட்டும் மொத்தமாக 16 மனித என்புக் கூட்டு தொகுதிகள் அடையாளம் காணப்பட்டுள்ளதுடன், ஏற்கனவே கண்டறியப்பட்ட 04 என்புக் கூட்டு தொகுதிகள் முழுமையாக அகழ்ந்து எடுக்கப்பட்டுள்ளன. 

செம்மணி மனித புதைகுழி தொடர்பான அகழ்வு பணிகள் இலங்கையின் உள்நாட்டு போருக்கால காணாமல் ஆக்கப்பட்டோர் மற்றும் பொதுமக்கள் படுகொலை குறித்த நீண்டகால குற்றச்சாட்டுகளுடன் தொடர்புபடுத்தப்பட்டு சர்வதேச மனித உரிமை அமைப்புகளாலும் கவனிக்கப்பட்டு வருகிறது.

 1990களில் முதன்முறையாக வெளிச்சத்துக்கு வந்த செம்மணி புதைகுழி, வடக்கிலான போர்க்கால மனித உரிமை மீறல்களின் முக்கிய சாட்சியிடமாகக் கருதப்படுகிறது.

இதுவரை நடைபெற்ற அகழ்வு பணிகளின் அடிப்படையில் மொத்தமாக 318 மனித என்புக்கூடுகள் அடையாளம் காணப்பட்டுள்ள நிலையில், அவற்றில் 302 என்புக் கூட்டு தொகுதிகள் முழுமையாக அகழ்ந்து எடுக்கப்பட்டுள்ளதாக அதிகாரப்பூர்வ தகவல்கள் தெரிவிக்கின்றன. 

சிறுவர்களின் என்புக்கூடுகள் அடையாளம் காணப்பட்டுள்ளமை, போரால் பாதிக்கப்பட்ட குடும்பங்களிடையே மீண்டும் ஆழ்ந்த துயரத்தையும் அதிர்ச்சியையும் ஏற்படுத்தியுள்ளது.

ஆவா குழுவின் அருண் சித்தார்த் இன்று அரசியல் வாதி!!

அருண் சித்தார்த் எனும் அருளானந்தம் அருணின் உண்மைப் பின்னணி யாழ்ப்பாணத்தைச் சேர்ந்த இவர் ஆரம்பத்தில் ஆவா குழுவின் தலைவனாக செயல்பட்டவர். 2009 ஆம் ஆண்டுக்குப் பின்னர் பெரிய அளவிலான போதைப்பொருள் கடத்தல் மற்றும் வியாபாரத்தில் ஈடுபட்ட காலத்தில் பொலிசாரால் கைது செய்யப்பட்டார். 

இருப்பினும், இராணுவ புலனாய்வுப் பிரிவினரின் தலையீட்டால் விடுவிக்கப்பட்டாலும், இவர் மீதான வழக்கு இன்றும் நீதிமன்றத்தில் நிலுவையில் உள்ளது. குடும்பப் பின்னணியில் ஒரு துயர சம்பவம்: சுன்னாகம் பகுதியைச் சேர்ந்த ஒரு பெண்ணுடன் இவர் காதலில் ஈடுபட்டார்.

 அப்பெண்ணின் கணவர் தனது உறவினர் ஒருவரைக் கொலை செய்த குற்றச்சாட்டில் பல ஆண்டுகளாக சிறையில் அடைக்கப்பட்டிருந்தார். சிறையிலிருந்து வெளிவந்த பிறகு, தனது மனைவி அருணுடன் வாழ்வதை அறிந்த அவர் மிகுந்த மனவேதனை அடைந்தார். 

 குடிபோதைக்கு அடிமையாகி, சுன்னாகம் மருதனார்மடம் பகுதியில் மக்களிடம் பிச்சை எடுத்தும், தெருவோரக் கடைகளில் இரவில் தங்கியும் வாழ்ந்து வந்தார். இறுதியில் அண்மையில் அவர் அனாதரவாக உயிரிழந்தார் என்பது அப்பகுதி மக்களை மிகவும் துயரத்தில் ஆழ்த்தியது.

 புதிய வேடம்: இராணுவ புலனாய்வுப் பிரிவினரின் ஆதரவால் இவர் ஒரு அரசியல் சமூகச் செயற்பாட்டாளராக மாறுவேடம் போட்டுக்கொண்டார். ஆவா குழுத் தலைவனாகவும், போதைப்பொருள் மாஃபியாவாகவும் இருந்த தனது முந்தைய அடையாளத்தை முற்றிலும் மாற்றி, ஒரு அரசியல்வாதி போல தன்னை உருவாக்கிக் கொண்டார். 

இதற்கான ஆயுதமாக இவர் புலி எதிர்ப்பு மற்றும் யாழ்ப்பாணத்தில் நிலவும் சாதி அடக்குமுறை ஆகியவற்றை பயன்படுத்தினார். சமூக ஊடகங்களில் இதுபற்றி பிரச்சாரம் செய்தார். இவருக்கு பின்னால் இராணுவ புலனாய்வுப் பிரிவும் சிங்கள அரசும் இருந்ததால், இவரது புலி எதிர்ப்புக் கருத்துகளை யாரும் எதிர்க்கவோ தடுக்கவோ முடியவில்லை.

இதனால் யாழ்ப்பாணச் சமூகத்தில் இவருக்கு ஓரளவு இடம் கிடைத்தது. உண்மையான அறிவும் பின்னணியும்: சொந்தமாக எந்தவிதமான நிலையான உழைப்பு அல்லது வருமானமும் இல்லாத இவர், அரசியல் அலுவலகத்தில் கணினிகளையும், சில புத்தகங்களையும் வைத்துக்கொண்டு தன்னை ஒரு அறிஞராகக் காட்டிக்கொள்கிறார். 

 போதைப்பொருள் வியாபாரத்தில் ஈடுபட்ட காலத்தில் கொஞ்சம் சிங்களமும், சுயமாக கொஞ்சம் ஆங்கிலமும் கற்றுக்கொண்டார். ஆரம்ப காலங்களில் தான் ஒரு ஆசிரியர் என்றும், தனது தந்தை, தாத்தா, முப்பாட்டன் ஆகியோர் கள்ளுச்சீவும் தொழிலைச் செய்தவர்கள் என்றும் கூறியுள்ளார். 

இவருக்கு தெரிந்த அரசியல் என்பது 1990க்குப் பின்னரான இராணுவ அரசியலும் புலிகள் தொடர்பான விவரங்களும் மட்டுமே. 1948 முதல் 1978, 1983 மற்றும் 2009 இனப்படுகொலை வரை ஈழத்தமிழ் மக்கள் அனுபவித்த துயரங்கள் அனைத்தும், தொடர்ந்த போதைப்பொருள் பயன்பாட்டால் இவரது நினைவிலிருந்து மறைந்துவிட்டதாகக் கூறப்படுகிறது. 

அருண் சித்தார்த் – சிங்கள அரசின் புலனாய்வுப் பிரிவுகளான தேசிய புலனாய்வுப் பிரிவு (NI) மற்றும் இராணுவ புலனாய்வுப் பிரிவு (MI) ஆகியவற்றால் ஒப்படைக்கப்பட்ட பணிகள்: 

 1. தமிழ் மக்களிடையே பிளவை உருவாக்குதல் சாதி, மத அடிப்படையிலான வேறுபாடுகளைத் தூண்டி தமிழ் சமூகத்திற்குள் பிரிவினைகளை ஏற்படுத்தல். 

 2. இளையோரை சீர்குலைத்தல் தமிழ் இளைஞர்கள் மத்தியில் போதைப்பொருள் பயன்பாட்டைப் பரப்பி, அவர்களிடம் உள்ள தேசிய உணர்வையும் நீதிக்கான போராட்டக் குணத்தையும் அழித்தொழித்தல்.

 3. உள்மோதல்களைத் தூண்டுதல் இளைஞர் குழுக்களுக்கிடையே மோதல்கள், கத்திவெட்டுச் சம்பவங்கள் போன்றவற்றை ஊக்குவித்து, ஒவ்வொரு ஊரிலும் கிராமத்திலும் பகைமையை வளர்த்தல்.

 4. வரலாற்றைத் திரித்தல் விடுதலைப் புலிகள் மற்றும் அவர்களது தலைவர்கள், போராளிகள் குறித்து தவறான கருத்துகளைப் பரப்பி, மக்கள் மனதில் தவறான பார்வையை ஏற்படுத்தல். 

5. உண்மையை மறைத்தல் சிங்கள இனம், அரசு, இராணுவம் செய்த அனைத்தும் சரியானது என்றும், தமிழ் மக்களும் புலிகளுமே தவறு செய்தவர்கள் என்றும் மக்களை நம்ப வைக்க முயற்சித்தல். இதுவே இவரது உண்மை முகம்! சமூகத்தை ஏமாற்றும் மாறுவேடத்தை மக்கள் கண்டறிய வேண்டும்.

குறிப்பு: இது திரட்டப்பட்ட தகவல்கள் மற்றும் குற்றச்சாட்டுகளின் அடிப்படையிலான பதிவாகும். இவற்றுக்கான முழுமையான, சுதந்திரமான விசாரணை முடிவுகள் வேறுபடலாம் என்பதைக் கவனத்தில் கொள்ளவும்.

பிலிப்பைன்ஸில் சக்திவாய்ந்த நிலநடுக்கத்தில் 15 பேர் உயிரிழந்தனர் !!

பிலிப்பைன்ஸில் ஏற்பட்ட சக்திவாய்ந்த நிலநடுக்கத்தில் குறைந்தது 15 பேர் உயிரிழந்தனர் மற்றும் 129 பேர் காயமடைந்தனர்.

நிலநடுக்கத்திற்குப் பிறகு, இங்கிலாந்தின் வெளியுறவு, காமன்வெல்த் மற்றும் மேம்பாட்டு அலுவலகம் (FCDO), மின்டானோ பிராந்தியத்திற்கான பாதுகாப்பு வழிகாட்டுதல்களை வெளியிட்டுள்ளது. 

 நீங்கள் பாதிக்கப்பட்ட பகுதியில் இருந்தால், உள்ளூர் அதிகாரிகளின் ஆலோசனையைப் பின்பற்றுங்கள் மற்றும் சேதமடைந்த கட்டிடங்களைத் தவிர்க்கவும் என்று FCDO கூறுகிறது. 

 மேலும், நீங்கள் மின்டானோவிற்குப் பயணம் செய்யத் திட்டமிட்டிருந்தால், சமீபத்திய தகவல்களுக்கு உங்கள் பயணச் சேவை வழங்குநரைத் தொடர்புகொள்ளுங்கள் மற்றும் உங்கள் பயணக் காப்பீடு இயற்கை பேரழிவுகளையும் உள்ளடக்கியதா என்பதை உறுதிப்படுத்திக் கொள்ளுங்கள் என்றும் அது மேலும் கூறுகிறது.

கென்ட் மற்றும் எசெக்ஸ் இடையே சாலை சுரங்கப்பாதை £3 பில்லியன்!!

கீழ் தேம்ஸ் கிராசிங்கிற்கான 'கட்டுக்கடங்காத' செலவினத்திற்காக கூடுதலாக £174 மில்லியன் ஒதுக்கப்பட்டுள்ளது. கென்ட் மற்றும் எசெக்ஸ் இடையே முன்மொழியப்பட்ட சாலை சுரங்கப்பாதைக்காக £3 பில்லியனுக்கும் அதிகமாக செலவிடப்பட உள்ளது, 

இது HS2-ஐ விட ஒரு மைலுக்கு அதிக செலவுகளைக் கொண்டிருக்கும் என மதிப்பிடப்பட்டுள்ளது.பிரிட்டனின் மிகப்பெரிய திட்டமிடப்பட்ட உள்கட்டமைப்புத் திட்டங்களில் ஒன்றான லோயர் தேம்ஸ் கிராசிங் சாலை சுரங்கப்பாதையை அமைக்க உதவுவதற்காக, அமைச்சர்கள் கூடுதலாக £170 மில்லியனுக்கும் அதிகமான நிதியை ஒதுக்கியுள்ளனர். 

இது, இத்திட்டத்தின் "கட்டுக்கடங்காமல் அதிகரித்து வரும்" செலவுகள் குறித்த கவலைகளைத் தூண்டியுள்ளது. கென்ட் மற்றும் எசெக்ஸ் இடையே தேம்ஸ் நதிக்கு அடியில் அமையவிருக்கும் £11 பில்லியன் மதிப்பிலான இந்த வழித்தடத்திற்கு, லண்டனிலிருந்து பர்மிங்காம் வரையிலான HS2 அதிவேக ரயில் இணைப்பை விட ஒவ்வொரு மைலுக்கும் அதிக செலவாகும் என ஏற்கனவே மதிப்பிடப்பட்டுள்ளது. 

ஒரு தனியார் துறை நிறுவனத்திடமிருந்து எதிர்பார்க்கப்படும் £7.5 பில்லியன் நிதி முதலீட்டிற்கு முன்பாக, இத்திட்டத்திற்காக £3.1 பில்லியன் பொதுப் பணத்தைச் செலவிடும் திட்டத்தின் ஒரு பகுதியாக இந்த நிதி ஊக்கம் வழங்கப்பட்டுள்ளது. 

 கூடுதலாக ஒதுக்கப்பட்டுள்ள £174 மில்லியன் நிதியானது, சுரங்கப்பாதையின் இருபுறமும் உள்ள பொதுப் பணிகளுக்கு நிதியளிக்கப் பயன்படுத்தப்படும் என்றும், இந்த நிதி ஏற்கனவே உள்ள வரவுசெலவுத் திட்டங்களிலிருந்து பெறப்படும் என்றும் போக்குவரத்துத் துறை (DfT) தெரிவித்துள்ளது. 

கீழ் தேம்ஸ் கிராசிங் திட்டத்தின் நேரடிக் கட்டுப்பாட்டை போக்குவரத்துத் துறை (DfT) எடுத்துக்கொண்டதால், திட்டமிடல் மற்றும் மேற்பார்வையில் ஈடுபட்டிருந்த பிரதான முகமை என்ற தனது பொறுப்பிலிருந்து தேசிய நெடுஞ்சாலைத் துறை விலக வேண்டிய கட்டாயம் ஏற்பட்டது என தி கார்டியன் கடந்த ஆண்டு வெளிப்படுத்தியது.

யாழ் செம்மணி மனிதப் புதைகுழி அகழ்வில் 302 எலும்புக்கூடுகள்!!

யாழ் - செம்மணி மனிதப் புதைகுழியில் இதுவரை அடையாளம் காணப்பட்ட மனித எலும்புக்கூடுகளின் எண்ணிக்கை 302 ஆக உயர்வடைந்துள்ளது. செம்மணி மனிதப் புதைகுழியின் மூன்றாம் கட்ட அகழ்வுப் பணிகள் 18 ஆவது நாளாக இன்றும் (7) முன்னெடுக்கப்பட்டது. 

இன்றைய தினம் மாத்திரம் 06 எலும்பு கூட்டு தொகுதிகள் அடையாளம் காணப்பட்டன. அத்துடன் ஏற்கனவே அடையாளம் காணப்பட்ட இரண்டு சிறுவர்களின் எலும்பு கூட்டு தொகுதி உட்பட 08 எலும்பு கூட்டு தொகுதிகள் அகழ்ந்து எடுக்கப்பட்டுள்ளன. 

இந்நிலையில் செம்மணி மனித புதைகுழியில் இதுவரையில் நடைபெற்ற அகழ்வு பணிகளின் போது, 302 எலும்பு கூடுகள் அடையாளம் காணப்பட்டுள்ள நிலையில் 298 எலும்பு கூடுகள் முற்றாக அகழ்ந்து எடுக்கப்பட்டுள்ளன. 

 கடந்த சில நாட்களாக செம்மணி மனித புதைகுழியில் இருந்து சிறுவர்களின் என்பு கூட்டு தொகுதிகள் தொடர்ச்சியாக மீட்கப்பட்டு வருகின்றன. அத்துடன், சிறுவர்களுடைய இரு எலும்புக்கூடுகள் உட்பட மொத்தம் 8 எலும்புக்கூட்டுத் தொகுதிகள் இன்று முழுமையாக அகழ்ந்தெடுக்கப்பட்டுள்ளன. இந்தப் பகுதியில் மேலதிக அகழ்வுப் பணிகள் தொடர்ந்தும் முன்னெடுக்கப்பட்டு வருகின்றன.

இங்கிலாந்தில் NHS நோயறிதல் சோதனை காத்திருக்கும் எண்ணிக்கை 1.92 மில்லியன்!!

இங்கிலாந்தில் NHS நோயறிதல் சோதனைகளுக்காக சாதனை எண்ணிக்கையிலான மக்கள் காத்திருக்கின்றனர் பட்டியலில் உள்ள 1.92 மில்லியன் நோயாளிகளில் ஐந்தில் ஒருவர், CT மற்றும் MRI ஸ்கேன்கள் போன்ற சோதனைகளுக்காக ஆறு வாரங்களுக்கும் மேலாகக் காத்திருக்கின்றனர் என ஒரு பகுப்பாய்வு காட்டுகிறது.

NHS-இல் நோயறிதல் பரிசோதனைக்காக முன்னெப்போதும் இல்லாத அளவுக்கு அதிகமான மக்கள் காத்திருக்கின்றனர். இதனால், CT மற்றும் MRI ஸ்கேன்களைப் பெறுவதில் ஏற்படும் தாமதங்கள் நோயாளிகளின் உடல்நலத்திற்கு ஆபத்தை விளைவிக்கக்கூடும் என்ற அச்சம் எழுந்துள்ளது.

 இங்கிலாந்தில் மொத்தம் 19.2 லட்சம் நோயாளிகள், அல்ட்ராசவுண்ட் ஸ்கேன், செவித்திறன் மதிப்பீடு, எலும்பு ஸ்கேன் அல்லது புற்றுநோய்க்கான பல்வேறு சோதனைகள் போன்றவற்றின் மூலம் தங்கள் நோயைக் கண்டறியும் பரிசோதனைக்காகக் காத்திருக்கின்றனர். பரிசோதனைகளுக்கான தேவை, அதை நிறைவேற்றும் NHS-இன் திறனை மிஞ்சியுள்ளது. 

மேலும், காத்திருப்போர் பட்டியலில் உள்ளவர்களில் ஐந்தில் ஒருவர் – அதாவது 4 லட்சத்திற்கும் அதிகமான மக்கள் – அதிகபட்சமாகக் கருதப்படும் ஆறு வாரக் காலத்தை விட நீண்ட காலம் காத்திருக்க வேண்டியுள்ளது என இங்கிலாந்தின் நோயறிதல் சேவைகள் குறித்த ஒரு பகுப்பாய்வு கண்டறிந்துள்ளது. 

நோயறிதல் சோதனைகளுக்கான காத்திருப்புப் பட்டியலில் ஏற்பட்டுள்ள இந்த உயர்வு, திட்டமிடப்பட்ட மருத்துவமனை சிகிச்சைகளுக்கான நிலுவையை 7.1 மில்லியனாகக் குறைப்பதில் NHS சமீபத்தில் பெற்ற வெற்றிக்கு முற்றிலும் முரணாக உள்ளது. 

இந்த எண்ணிக்கை, ஜூலை 2025-ல் இருந்ததை விட 500,000 குறைவாகும். சுகாதார தொழில்நுட்ப நிறுவனமான மெஜென்டஸின் அறிக்கை மேலும் வெளிப்படுத்துவது என்னவென்றால்: 2022-ஆம் ஆண்டிலிருந்து நோயறிதல் காத்திருப்புப் பட்டியல் 500,000 அதிகரித்துள்ளது. இது கோவிட் பெருந்தொற்றுக்கு முன்பு இருந்ததை விட 83% அதிகமாகும். 

தற்போதைய போக்குகளின்படி, மார்ச் 2027-ல் காத்திருப்புப் பட்டியல் 2 மில்லியனை எட்டும். மேலும், இங்கிலாந்தின் மிக நீண்ட காத்திருப்புப் பட்டியல்களைக் கொண்ட பகுதிகளில் வசிக்கும் மக்கள், புற்றுநோய் கண்டறிதலைப் பெறுவதற்கோ அல்லது இதயப் பிரச்சனைகளுக்கான சிகிச்சையைப் பெறுவதற்கோ வழக்கத்திற்கு மாறாக நீண்ட தாமதங்களை எதிர்கொள்கின்றனர் என்றும் அது கண்டறிந்துள்ளது. 

உதாரணமாக, ஒரு சோதனைக்காக ஆறு வாரங்களுக்கு மேல் காத்திருக்கும் நோயாளிகளின் விகிதம் அதிகமாக உள்ள ஒருங்கிணைந்த பராமரிப்பு வாரியப் பகுதிகளில் வசிக்கும் மக்கள், NHS-இன் 28-நாள் இலக்கிற்குள் புற்றுநோயைக் கண்டறியப்படாமல் போவதற்கான வாய்ப்பு கிட்டத்தட்ட ஆறு மடங்கு அதிகமாக உள்ளது. 

 நோயாளிகள் சங்கம் இந்த நிலைமை குறித்து ஆழ்ந்த கவலையை வெளிப்படுத்தியதுடன், சிகிச்சையைத் தொடங்குவதற்குத் தேவையான நோயறிதல் பரிசோதனைக்காக நோயாளிகள் காத்திருக்கும் வேளையில் அவர்களின் உடல்நிலை மோசமடையக்கூடும் என்றும் எச்சரித்தது. 

 "ஒரு நோயறிதல் பரிசோதனை என்பது நோயாளியின் பயணத்தின் முடிவல்ல – அதுவே ஆரம்பம். அது இல்லாமல், சிகிச்சையைத் தொடங்க முடியாது, நிலைமைகள் மோசமடையும், மேலும் ஆரம்பத்திலேயே கண்டறியப்பட்டிருக்கக்கூடிய ஒரு நோய், சிகிச்சையளிப்பதற்கு மிகவும் கடினமான ஒன்றாக மாறிவிடும்," என்று அதன் தலைமை நிர்வாகி ரேச்சல் பவர் கூறினார்.