ஈரானின் ஐஆர்ஜிசி 4 எண்ணெய் கப்பல்கள் அழிந்தன, MQ-9 ஆளில்லா விமானம் சுட்டு வீழ்த்தப்பட்டது.

ஹோர்முஸ் ஜலசந்தியில் விதிமீறலில் ஈடுபட்ட இரண்டு கப்பல்களை இடைமறித்ததாகவும், 56வது அமெரிக்க MQ-9 ஆளில்லா விமானத்தைச் சுட்டு வீழ்த்தியதாகவும் இஸ்லாமியப் புரட்சிக் காவலர் படை (IRGC) அறிவித்துள்ளது.

புதன்கிழமை காலை வெளியிட்ட ஓர் அறிக்கையில், ஐ.ஆர்.ஜி.சி-யின் மக்கள் தொடர்பு அலுவலகம், ஐ.ஆர்.ஜி.சி-யின் கடற்படை மற்றும் விண்வெளிப் படை ஆகியவை எதிரிக்குக் கடுமையான இழப்புகளை ஏற்படுத்தியுள்ளதாகத் தெரிவித்துள்ளது. ஹோர்முஸ் நீரிணைக்குத் தெற்கே தடைசெய்யப்பட்ட பாதையில் செல்ல முயன்ற, விதிமீறலில் ஈடுபட்ட நான்கு எண்ணெய் கப்பல்கள், கடற்படைக் கண்ணிவெடிகளில் மோதி அழிந்தன.

 அவை இன்னும் தீப்பிழம்புகளால் சூழப்பட்டுள்ளன. விதிமீறலில் ஈடுபட்ட மற்ற இரண்டு கப்பல்கள் வழிமறிக்கப்பட்டு நிறுத்தப்பட்டுள்ளன. மேலும், “அதுமட்டுமின்றி, ஐ.ஆர்.ஜி.சி விண்வெளிப் படையின் வான் பாதுகாப்புப் பணியாளர்கள், இன்று அதிகாலை 4:30 மணிக்கு (உள்ளூர் நேரம்), ஹோர்முஸ் ஜலசந்திக்கு மேலே, ஒரு மேம்பட்ட வான் பாதுகாப்பு அமைப்பைப் பயன்படுத்தி, தங்களின் திறமையான செயல்பாட்டின் மூலம், MQ-9 ஆளில்லா விமானம் ஒன்றை அதன் வகையில் இது 56வது ஆகும் வெற்றிகரமாகத் தாக்கிச் சுட்டு வீழ்த்தினர்,

” என்று அது மேலும் கூறியது. அந்த அறிக்கையின்படி, “இஸ்லாத்தின் போராளிகள், துப்பாக்கியின் விசையின் மீது விரல்களை வைத்தபடி, குழந்தைகளைக் கொல்லும் சியோனிச ஆட்சிக்கும் ஆக்கிரமிப்பாளரான அமெரிக்காவிற்கும் இறுதி அடியைக் கொடுக்கத் தயாராக நிற்கிறார்கள்.”

ஈரானின் கெஷம் தீவு மீது அமெரிக்கா தாக்குதல்!!

ஈரானின் முக்கியத்துவம் வாய்ந்த கெஷம் தீவு மீது அமெரிக்கா ரகசியமாகத் தாக்குதல் நடத்தியதாக, அமெரிக்க அதிகாரிகளை மேற்கோள்காட்டி ‘வால் ஸ்ட்ரீட் ஜர்னல்’ செய்தி வெளியிட்டுள்ளது.

 இந்தத் தாக்குதல் குறித்து அமெரிக்க அரசு அதிகாரபூர்வமாக எந்தத் தகவலையும் வெளியிடவில்லை. அமெரிக்கா–ஈரான் இடையே கடந்த பிப்ரவரி முதல் போர் நடைபெற்று வருகிறது. ஈரான் அணு ஆயுதங்கள் தயாரிக்கும் முயற்சியைத் தடுப்பதாகக் கூறி அமெரிக்கா தாக்குதலைத் தொடங்கியது. இதற்குப் பதிலடியாக ஈரான், மத்திய கிழக்கில் உள்ள அமெரிக்க ராணுவத் தளங்கள் மீது தாக்குதல் நடத்தியது. 

மேலும், எண்ணெய் மற்றும் எரிவாயு ஏற்றுமதிக்கு முக்கிய கடல்வழிப் பாதையான ஹார்முஸ் ஜலசந்தியை முடக்கியது. இதனால் உலகளவில் எரிபொருள் தட்டுப்பாடு ஏற்பட்டதுடன், போரை முடிவுக்கு கொண்டுவர அமெரிக்காவுக்கு அழுத்தம் அதிகரித்தது. இதனிடையே, போரை முடிவுக்கு கொண்டுவர இரு நாடுகளும் பேச்சுவார்த்தையில் ஈடுபட்டு வருகின்றன.

கத்தார் தலைநகர் தோஹாவில் பல கட்டங்களாக பேச்சு நடைபெற்று வருகிறது. போர் நிறுத்தத்துக்கான நேர்மறையான அறிகுறிகள் இருப்பதாக இரு தரப்பும் தெரிவித்துள்ளன.

 ஈரானின் அணுசக்தித் திறன் முழுமையாக அழிக்கப்பட்டுவிட்டதாகவும், ஒன்றிரண்டு அணுசக்தி மையங்கள் மட்டுமே இருப்பதாகவும், அவற்றையும் விரும்பினால் 10 நிமிடங்களில் அழிக்க முடியும் என்றும் அமெரிக்க அதிபர் டிரம்ப் அண்மையில் தெரிவித்திருந்தார். 

ஹார்முஸ் ஜலசந்தியின் நுழைவாயிலில் அமைந்துள்ள கெஷம் தீவில் ஈரானின் எண்ணெய் பொருளாதாரம் மற்றும் ராணுவக் கட்டமைப்புகள் உள்ளன. ஏவுகணை இருப்புகள் உள்ளிட்ட ராணுவக் கட்டமைப்புகளும் அங்கு அதிகம் உள்ளன. 

போர் உச்சத்தில் இருந்த ஆண்டின் மத்தியில், தீவு மீது அமெரிக்கா நடத்திய தாக்குதல்களில் ராணுவக் கட்டமைப்புகள் சேதமடைந்ததாகத் தெரிவித்திருந்தது.

ஈரோடு 9 ஆயிரம் மகளிர் சுய உதவிக்குழுக்களுக்கு ரூ.1,110 கோடி

ஈரோடு மாவட்டம், பெருந்துறையில் அரசு சார்பில் நடைபெற்ற விழாவில் முதலமைச்சர் விஜய் கலந்து கொண்டு 9 ஆயிரம் மகளிர் சுய உதவி குழுக்களுக்கு தொழில் தொடங்குவதற்காக ரூ.1,110 கோடி மதிப்பில் வங்கி கடன் உதவி வழங்கினார்.

பட்டினப்பாக்கத்தில் புதிய தலைமைச் செயலகம்

பட்டினப்பாக்கத்தில் புதிய தலைமைச் செயலகம் அமைப்பது தொடர்பாக இன்று நடைபெற இருந்த பேச்சுவார்த்தை வியாழக்கிழமைக்கு ஒத்திவைக்கப்பட்டுள்ளது. சென்னை பட்டினப்பாக்கத்தில் ரூ.1,200 கோடியில் 20 லட்சம் சதுர அடி பரப்பளவில் புதிய சட்டமன்றம் மற்றும் தலைமைச் செயலகம் அமைக்க தமிழக அரசு திட்டமிட்டு, அதற்கான அறிவிப்பையும் வெளியிட்டது. 

ஆனால், இதற்கு பல்வேறு தரப்பினரும் எதிர்ப்பு தெரிவித்து வருவதுடன், அப்பகுதி மீனவர்களும் போராட்டங்களில் ஈடுபட்டு வருகின்றனர். இந்த சூழ்நிலையில், பட்டினப்பாக்கத்தில் தலைமைச் செயலகம் கட்டத் திட்டமிடப்பட்டுள்ள பகுதியில் உள்ள வீட்டு வசதி வாரியத்தின் பழைய குடியிருப்புகளை இடித்து அகற்ற தற்போது நடவடிக்கை எடுக்கப்பட்டுள்ளது.

 அதாவது, இந்த கட்டடங்களை இடிக்கும் பணியை மேற்கொள்ள தமிழ்நாடு வீட்டு வசதி வாரியம் ஒப்பந்தப்புள்ளி கோரியுள்ளது. எனவே, பட்டினப்பாக்கத்தில் தலைமைச் செயலகம் கட்டும் திட்டத்தைத் தமிழக அரசு கைவிடவில்லை என்பதற்கான அறிகுறியாக இந்த நடவடிக்கை பார்க்கப்படுகிறது. 

இந்த நிலையில், பட்டினப்பாக்கத்தில் புதிய தலைமைச் செயலகம் அமைப்பது தொடர்பாக இன்று நடைபெற இருந்த பேச்சுவார்த்தை வியாழக்கிழமைக்கு ஒத்திவைக்கப்பட்டுள்ளது. சென்னை மாவட்ட ஆட்சியர் தலைமையில் இன்று நடைபெற இருந்த இ்ப்பேச்சுவார்த்தைக்கு எழுத்துப்பூர்வமான அழைப்பு வரவில்லை என மயிலை அனைத்து மீனவ கிராம பஞ்சாயத்து சபை சார்பில் தெரிவிக்கப்பட்ட நிலையில் ஒத்திவைக்கப்பட்டுள்ளது.

கருப்பு ஜூலை குறித்து ஆராய விசேட குழு

1983 கருப்பு ஜூலை துயரச் சம்பவம் மற்றும் அதன் தாக்கம் குறித்து முழுமையான ஆய்வை மேற்கொள்வதற்காக விசேட பாராளுமன்றக் குழுவொன்றை நியமிக்குமாறு கோரி, அது தொடர்பான யோசனை பாராளுமன்றத்தில் சமர்ப்பிக்கப்பட்டுள்ளது.

தேசிய மக்கள் சக்தியின் பாராளுமன்ற உறுப்பினர் தனுர திஸாநாயக்கவினால் இந்த யோசனை பாராளுமன்றத்தில் சமர்ப்பிக்கப்பட்டதுடன், அதே கட்சியைச் சேர்ந்த பாராளுமன்ற உறுப்பினர் பாக்ய ஸ்ரீ ஹேரத்தினால் அது உறுதி செய்யப்பட்டது. 

கருப்பு ஜூலை சம்பவம் குறித்து முழுமையான ஆய்வு செய்து அறிக்கையிடுதல், தேசிய நல்லிணக்கத்தை உறுதிப்படுத்துதல் மற்றும் பாதிக்கப்பட்ட மக்களுக்கு நிவாரணம் வழங்குதல் தொடர்பில் தமது யோசனைகள் மற்றும் பரிந்துரைகளை பாராளுமன்றத்திற்கு சமர்ப்பிப்பதே இந்த விசேட குழுவின் நோக்கமாகும்.

சுற்றுலா சென்ற 20 வயதுடைய பிரான்ஸ் நாட்டுப் பெண் ஒருவர் பாலியல்

இலங்கையின் ருமஸ்ஸல பகுதியில் அமைந்துள்ள ஜங்கிள் பீச்சிற்கு சுற்றுலா சென்ற 20 வயதுடைய பிரான்ஸ் நாட்டுப் பெண் ஒருவர் பாலியல் துஷ்பிரயோகத்திற்கு உள்ளாக்கப்பட்டதாகக் கூறப்படும் சம்பவம் தொடர்பில் 21 வயதுடைய இளைஞர் ஒருவர் பொலிஸாரால் கைது செய்யப்பட்டுள்ளார். 

கைது செய்யப்பட்ட சந்தேகநபர் ராகம பகுதியைச் சேர்ந்தவர் எனவும், சம்பவம் இடம்பெற்றதாகக் கூறப்படும் நேரத்தில் அவர் குறித்த பகுதிக்கு சென்றிருந்ததாகவும் தெரிவிக்கப்பட்டுள்ளது. 

சம்பவம் தொடர்பாக கிடைத்த தகவலின் அடிப்படையில் உனவட்டுன சுற்றுலா பொலிஸ் பிரிவினர் சந்தேகநபரைக் கைது செய்துள்ளனர். பாதிக்கப்பட்டதாகக் கூறப்படும் பிரான்ஸ் நாட்டுப் பெண்ணின் பாதுகாப்பை உறுதிப்படுத்திய பின்னர், மேலதிக சட்ட நடவடிக்கைகளுக்காக சந்தேகநபர் ஹபராதுவ பொலிஸாரிடம் ஒப்படைக்கப்பட்டுள்ளார். சம்பவம் தொடர்பான மேலதிக விசாரணைகளை பொலிஸார் முன்னெடுத்து வருகின்றனர்.

யாழ் அளவெட்டி நண்பர்களுடன் சென்ற குடும்பஸ்தர் சடலமாக மீட்பு

யாழ்ப்பாணத்தை சேர்ந்த குடும்பஸ்தர் வீட்டில் இருந்து நண்பர்களுடன் வெளியில் சென்ற நிலையில் குளமொன்றில் இருந்து சடலமாக மீட்கப்பட்டுள்ளார். குறித்த சடலம் இன்றைய தினம் திங்கட்கிழமை அளவெட்டி பகுதியில் உள்ள குளமொன்றில் மீட்கப்பட்டுள்ளதாக காவல்துறையினர் தெரிவித்துள்ளனர். 

அளவெட்டி பகுதியில் உள்ள குளமொன்றில் சடலம் ஒன்று மிதப்பதாக தெல்லிப்பழை காவல்துறையினருக்கு கிடைத்த தகவலின் அடிப்படையில் சம்பவ இடத்திற்கு சென்ற காவல்துறையினர் சடலத்தை மீட்டு உடற்கூற்று பரிசோதனைக்காக வைத்தியசாலைக்கு அனுப்பி வைத்துள்ளனர்.

சம்பவம் தொடர்பில் காவல்துறையினர் மேற்கொண்ட ஆரம்ப விசாரணையில், சடலமாக மீட்கப்பட்டவர் யாழ்ப்பாணத்தை சேர்ந்தவர், அளவெட்டி பகுதியில் திருமணம் முடித்து வாழ்ந்து வந்துள்ளார்.

நேற்றைய தினம் ஞாயிற்றுக்கிழமை நண்பர்கள் சிலருடன் வீட்டில் இருந்து சென்றுள்ளார். இந்நிலையிலையே குளத்தில் சடலமாக காணப்பட்டுள்ளார் என தெரியவந்துள்ளது. சம்பவம் தொடர்பில் தெல்லிப்பழை காவல்துறையினர் விசாரணைகளை முன்னெடுத்து வருகின்றனர்.