செயற்கைக்கோள் இணைய சேவையில் ஸ்டார்லிங்க் நிறுவனத்துடன் போட்டி

செயற்கைக்கோள் இணைய சேவையில் ஸ்டார்லிங்க் நிறுவனத்துடன் போட்டியிடத் தயார் என ரிலையன்ஸ் அறிவித்துள்ளது. இந்தியாவில் ஸ்டார்லிங்க் சேவையை துவக்க சில தொழிலதிபர்கள் குறிப்பாக அம்பானி தடையாக இருப்பதாக டெஸ்லா நிறுவனர் எலான் மஸ்க் குற்றம்சாட்டி இருந்தார். இந்த நிலையில் எங்கள் நிறுவனம் எப்போதும் போட்டியைக் கண்டு அஞ்சுவதில்லை; தகவல் தொடர்புத் துறையில் ஸ்டார்லிங்க் உட்பட எந்தவொரு நிறுவனத்துடனும் போட்டியிடத் தயாராக இருப்பதாகவும், போட்டியை நாங்கள் வரவேற்கிறோம் என்றும் ரிலையன்ஸ் நிறுவனம் கூறியுள்ளது. 

இது தொடர்பான அறிக்கையில், 2016-ல் தொடங்கப்பட்ட எங்களின் ஜியோ, தற்போது 53 கோடிக்கும் அதிக வாடிக்கையாளர்களை கொண்டுள்ளது. ஜியோவின் செயற்கைக்கோள், இணைய சேவைக்கான அனுமதிகள் கூட இன்னும் நிலுவையில் தான் உள்ளன,

ஒன்றிய அரசின் ஒப்புதல்களுக்காகக் காத்திருக்கின்றன. என ரிலையன்ஸ் குறிப்பிட்டுள்ளது. ஜியோ உட்பட ஒவ்வொரு நிறுவனமும் இந்தியாவின் கொள்கை, சட்டங்களுக்குக் கட்டுப்பட வேண்டும் எனவும் கூறப்பட்டுள்ளது. ஒன்றிய அரசு உள்நாட்டு மற்றும் வெளிநாட்டு நிறுவனங்கள் அனைத்திற்கும் ஒரே மாதிரியான அனுமதி நடைமுறைகளையே பின்பற்றுகிறது என்பதை புரிந்து கொள்ள வேண்டும் என ரிலையன்ஸ் கூறியுள்ளது. 

சமீபத்தில் எலான் மஸ்க் தனது 'எக்ஸ்' தளத்தில், முகேஷ் அம்பானி போன்ற இந்தியப் பெருநிறுவன அதிபர்கள் இந்தியாவில் ஸ்டார்லிங்க் நிறுவனத்தின் வருகையைத் தடுத்து, தங்களது ஏகபோக உரிமையைப் பாதுகாக்க முயல்வதாகக் குற்றம் சாட்டியிருந்தார்.